Kêng nar 20/6, rơh vơt Tổng thống Nga Vladimir Putin geh ƀư ueh ta ntŭk kan kruanh dak tĭng nău way an nuĭh leo kan ngih dak, kruanh dak Tô Lâm leo rơh vơt. Lôch rơh vơt, kruanh dak Tô Lâm n’hanh Tổng thống Liên bang Nga Vladimir Putin leo mpôl kan gâl têh 2 dak ƀư du rơh tâm nchră.

Năm 2024, Việt Nam n’hanh Nga kahgĭt 30 năm ký tâm ton Hiệp ước mpeh ăp nău way kan tơm khlăy bâh nău tâm rnglăp n’hanh 12 năm njêng nău tâm boh kan ndrel lĕ rngôch. Năm 2025 lĕ geh du nău dŭt khlăy rnôk ma Việt Nam n’hanh Nga kahgĭt 75 năm njêng nău tâm boh kan đah bar dak. Aơ lah ăp nău kan dŭt khlăy gay ma 2 dak ndrel nkoch tay, ryơk rnê tay ăp nău dơi tâm kơl ba năp nơh, nkre lah rdâk njêng trong kan hăn ndrel, tâm rgop ndrel hun hao tâm let năp tay. Rơh tât khâl bâh Tổng thống Putin rơh aơ mpơl du nău kan nchră nău đah dak bah dih khlăy bâh lĕ 2 dak, ntop dŭt khlăy ƀư ueh tay lơn nău tâm boh tâm rnglăp lĕ rngôch đah 2 dak, ntop an nău đăp mpăn, tâm kơl n’hanh huh hao ta nkual n’hanh ta lam ntur neh.