Nthoi tay rơh hăn khâl gưl Ngih dak tât dak CHDCND Lào, ôi 12/7, Kruanh dak Tô Lâm n’hanh mpôl đại biểu gưl têh Việt Nam hŏ tât khâl cán bộ, nuĭh kan Đại sứ quán Việt Nam n’hanh mâp rlău 100 kônh wa ntơh  măt ăp mpôl  kan hội đoàn, doanh nghiệp nuĭh Việt ta Lào. 

Kruanh dak Tô Lâm ôp khâl kônh wa, lah rjăp, Đảng, Ngih dak way uănh khlay tât kônh wa he gŭ dak bah dih, du gâl mô dơi tăch luh bah tâm rnglăp rnoi nuĭh, tâm nê geh nsum mpôl nuĭh Việt ta Lào; ŭch rŏng kônh wa way tâm rnglăp, way tĭng jăp pháp luật ta ntŭk. Kruanh dak rnê âk nuih n’hâm rŏng dak n’hanh ăp nău rgop khlay bah ƀon lan he gŭ dak bah dih đah rơh rdâk njêng n’hanh mât njrăng neh dak. Kruanh dak dăn đă  ăp nhih pah kan ntơh măt Việt Nam ta Lào ƀư jăp pah kan đah nuĭh Việt Nam ta dak bah dih, lơn lah tâm mât chăm,  ntop kơl kônh wa lăp rgum n’hanh ƀư ăp nău kan rdâk nkah tay nău tâm rnglăp nsum mpôl, tâm ban kơt rdâk njêng tay buăt nthoi tay đah kônh wa tâm n’hanh bah dih dak.