Ôi 10/6, Kruanh dak Tô Lâm ndrel mpôl pah kan Trung ương  hŏ tât râng lễ ntơm pah neh ƀư nhih nti mầm non Pắc Bó, xã Trường Hà, nkuâl Hà Quảng, n’gor Cao Bằng. Lah ta rơh lễ, Kruanh dak Tô Lâm mpơl nău rhơn dơi tât khâl me neh cách mạng dŭt ntoh lư Pắc Bó nkre đah Wa Hồ, nkre đah lịch sử cách mạng bah Đảng, Ngih dak; nkre dơi măt saơ ăp nău rgâl bah nău rêh nuĭh ƀon lan ta aơ, dơi uănh saơ ăp ntŭk nchrăp kan têh khlay bah n’gor hŏ nsĭt tay ăp nău dơi nsrôih uĕh, rgop n’hao nău rêh drăp ndơ n’hanh nuih n’hâm bah kônh wa ƀon lan ta ntŭk.

Kruanh dak rnê âk nkuâl Hà Quảng ăp  năm aơ hŏ rgum hun hao wăng sa, rêh jêng kon nuĭh, đăp mpăn njrăng n’gang neh dak n’hanh rnă njrăng, yơn ân way đăp mpăn n’hao nău rêh bah nuĭh ƀon lan. Kruanh dak lah kloh, rnôk hôm rêh Wa Hồ dêh rŏng way uănh khlay pah kan mât chăm rơh mom  ndăm bah kơi, lơn lah ăp druh ndăm rchong, kon se jê̆…. N’hanh aơ lah nău dơn kan ma Đảng n’hanh Ngih dak way uănh khlay gay lĕ rngôch ăp kon se dơi hăn tât nhih nti, dơi geh bah ăp nău dơi cách mạng. yor kơt nê̆ nău n’hao săk blău ntĭm nti, lah nău dŭt khlay, tâm nê  ân uănh khlay ntơm bah ăp gưl nti mầm non.