Dơn nău jă bah Kđăch dak Campuchia, Kruanh dak Tô Lâm ndrel Mpôl đại biểu gưl prêh ngih dak Việt Nam lĕ ntơm rơh khâl gưl Ngih dak tât dak Campuchia bah lơ 12 tât 13/7. Nklăp 2 mông 40 mnĭt kêng măng 12/7, Ƀư wơt na nê̆ Kruah dak Tô Lâm lĕ dơi ƀư têh ta Hoàng cung ta thủ đô Phnom Pênh đah nău ƀư tơm bah Kđăch Nô-rô-đôm Xi-ha-mô-ni. Jêh Ƀư wơt na nê̆ ta Hoàng Cung, Kruanh dak Tô Lâm lĕ geh rơh tâm nchră đah Kđăch Campuchia Nô-rô-đôm Xi-ha-mô-ni.

Ta kêng măng đŏng, Kruanh dak Tô Lâm lĕ rgum nchră đah Kruanh Đảng Nhân dân Campuchia, Kruanh Thượng viện Campuchia Hun Sen. 2 nuĭh kruanh uănh lah prêh ăp nău geh kan ndrel ma 2 ding lĕ dơi geh tâm năm bah năp. Gay ndơ̆ tâm boh 2 dak hun hao têh dăng lơn tâm lvang mhe, 2 ding tâm ban ŭch mbơh ƀư uĕh ăp tâm ton gưl prêh, săk rnglăy rơh mâp gưl prêh 2 Đảng, n’hao ăp rơh mâp, tâm mâp đah kruanh gưl prêh, ăp gưl n’hanh lĕ rngôch ăp trong, ngăn lah đah kruanh mom n’hanh druh  ndăm 2 dak, kơt đah ăp nuĭh kruanh mom nkual 3 dak hun hao;

mât uĕh săk rnglăy ăp trong ƀư Ủy ban hỗn hợp Việt Nam-Campuchia mpeh kan ndrel wăng sa, văn hóa, khoa học n’hanh kỹ thuật, Rƀŭn nchră kan ndrel n’hanh hun hao ăp n’gor n’har bri; nsrôih ƀư trong kan ndrel mhe kơt Rơh mâp đah 3 Kruanh n’gâng kan tâm rnglăp nchră nău Việt Nam-Campuchia-Lào; pơk hvi tâm nđŭr n’hanh kan ndrel tâm kơl nsum đah ăp ngih pah kan lập pháp, hành pháp n’hanh tư pháp, ăp rmôt kan nuĭh ƀon lan n’hanh ăp n’gor 2 dak.

Măng ndrel nar, Kđăch Nô-rô-đôm Xi-ha-mô-ni ƀư tơm jă ngêt sa têh Kruanh dak Tô Lâm n’hanh Mpôl đại biểu gưl prêh Ngih dak Việt Nam.