Kêng măng 7/6, ta Nhih pah kan Kruanh dak, Kruanh dak Tô Lâm hŏ wơt Đại sứ Liên minh Châu Âu (EU) n’hanh ăp Đại sứ, Ntơh măt ăp dak lăp kan nsum ta Hà Nội tât ôp khâl n’hanh mbah rhơn nkhêp dơi sơch ƀư Kruanh dak Cộng hòa xã hội chủ nghĩa Việt Nam. Ta rơh wơt, Kruanh dak Tô Lâm mpơl nău rhơn lor bôk năp mâp ăp Đại sứ, ntơh măt EU ta nău kan mhe; lah uĕh ăp nău mbah rhơn uĕh lăng bah kruanh gưl têh EU n’hanh ăp dak lăp kan nsum n’hanh ăp Đại sứ, ntơh măt.

Kruanh dak lah rjăp EU n’hanh ăp dak lăp kan nsum lah ăp băl tâm boh khlay bah Việt Nam; ŭch rŏng ăp Đại sứ, ntơh măt mbra way lah ntung njŏ khlay, rgop âk lơn đŏng tâm nău ntrŭt ntrôl tâm boh, tâm rnglăp lam lĕ rngôch đah Việt Nam đah EU n’hanh ăp dak kan nsum let năp tay, rgop ơm n’hao tâm boh Việt Nam-EU hun hao prêh mhe. Kruanh dak dăn đă ăp Đại sứ, ntơh măt tâm khâl tay ăp mpôl kruanh gưl têh n’hanh geh nău tam ngơi ntrŭt ntrôl ăp dak EU mô hŏ uănh an dŏng tâm ton mât njrăng ntuh kơl Việt Nam-EU (EVIPA) ơm uănh an dŏng nău tâm ton  n’hanh Ủy ban Châu Âu (EC) ơm ntlơi thẻ êr IUU đah tăch n’gluh tui ka bah Việt Nam, kơl Việt Nam hun hao wăng sa dak lêng, mât tui ka jŏ jong.