Kêng măng ntri (26/6), ta Nhih pah kan kruanh dak, Kruanh dak Tô Lâm hŏ wơt Đại sứ Ấn Độ ta Việt Nam Sandeep Arya. Ta rơh wơt, Kruanh dak lah rjăp Việt Nam n’hanh Ấn Độ geh tâm boh tâm rnglăp way ơm êt lhăt dơi Kruanh rđău kan n’hanh ƀon lan bar dak âk năm khay bun dăp, n’hanh aƀaơ hŏ jêng tâm boh têh  jong lam lĕ rngôch geh nău khlay tâm trong tâm boh nsum.

Đại sứ lah rjăp mbra nsrôih ntrŭt ntrôl tay tâm boh bar dak, bah năp măt lah nchrăp an ăp rơh hăn khâl n’hanh tâm mâp gưl têh tâm let năp tay, ƀư jru hvi  lơn tâm boh njrăng n’gang neh dak, wăng sa- tăch rgâl, khoa học - công nghệ, văn hóa – pâl nđaih n’hanh pơk hvi tât ăp trong kan mhe. Tâm  ôp mpeh ăp nkô̆ nău tâm nkual n’hanh lam ntŭr neh, Kruanh dak dăn đă bar dak kan nsum tay lhăt ta ăp rgum nchră âk ding, rgop tâm nău đăp mpăn, bah tâm lơh tâm su n’hanh hun hao ta nkual Châu Á - Thái Bình Dương n’hanh Ấn Độ Dương.