Kêng măng 24/6, ta Nhih pah kan kruanh dak, kruanh dak Tô Lâm hŏ wơt Đại sứ Cuba ta Việt Nam ndrel mpôl cán bộ Đại sứ quán Cuba tât hăn mâp dơm. Ta rơh wơt, Kruanh dak Tô Lâm lah rjăp, Đảng, Ngih dak n’hanh ƀon lan Việt Nam dŭt n’hâm uănh khlay tâm boh way ơm mha êng, nkre lah du ntôr, nkre lah oh nô đah Cuba; mpơl nău rhơn rnôk tâm boh mha êng đah bar dak mô rlu dơi rdâk nkah tay n’hanh geh âk njuat hun hao dăng, lam lĕ rngôch tâm rnôk lam ntŭr neh geh tât krit jêr.

Gay n’hao dăng tay tâm boh lam lĕ rngôch đah Việt Nam n’hanh Cuba, Kruanh dak dăn đă bar ding mât rnoh âk tâm khâl nsum, tâm mâp gưl têh; kan nsum lhăt, an ƀư geh nău tam ăp nău tâm ton gưl têh, ăp trong tâm boh ơm geh gay n’hao tâm boh mha êng Việt Nam-Cuba lăp tâng jru n’hanh ngăn ngăn lơn. Nkoch ăp bôk nău kan tâm boh bar ding, Kruanh dak ŭch rŏng bar ding an ƀư geh nău tam ăp bôk nău kan tâm boh hun hao tuch tăm, ntrŭt ntrôl tâm boh wăng sa- tăch rgâl- ntuh kơl bar ding, tâm ban kơt pơk hvi lơn đŏng tât ăp trong kan êng ƀa ƀă ma ăp ding săk geh âk.