Nar 17/6, Kruanh dak Tô Lâm hŏ wơt wa Gennady Bezdetko - Đại sứ Liên bang Nga ta Việt Nam. Kruanh dak lah rjăp Việt Nam way uănh Nga lah ngoăy tâm ăp băl tâm boh an ƀư lor bôk năp tâm trong kan dak bah dih bah he, way tĭng groi nđôi nô nău n’hanh kơl Nga hun hao đăp mpăn.

Đảng, Ngih dak n’hanh ƀon lan Việt Nam way nchih nkah nău kơl têh kuâng, lĕ nuih n’hâm ma ƀon lan Liên Xô n’hanh ƀon lan Nga hŏ rong an Việt Nam tâm  rơh rlăch ndăng nsĭt nău đăp  mpăn, dơn ngoăy neh dak ntơm nơh, tâm ban kơt rnôk rgâl mhe, rdâk njêng n’hanh mât njrăng neh dak aƀaơ. Kruanh dak Tô Lâm rnê âk nău hun hao uĕh bah tâm boh tâm rnglăp way ơm n’hanh  tâm boh têh jong lam lĕ rngôch đah Việt Nam n’hanh Nga tâm bah ri aơ ta lĕ rngôch ăp trong tâm boh, rhơn răm đah nău nsĭt geh tăch rgâl bar ding  tâm  bah ri aơ hao âk. Bar ding nha hôm săk geh âk gay ntrŭt ntrôl tâm boh, lơn lah tâm ăp trong kan kơt wăng sa- tăch rgâl- ntuh kơl, ntŭk ntô ndơ dŏng,  ntung trong nchuăn  rdeng, tâm nđŭr ƀon lan.