Kêng măng 17/7, ta Nhih pah kan kruanh dak, Kruanh dak Tô Lâm hŏ wơt wa Hùng Ba - Đại sứ geh nău dơi kan mha êng lam lĕ rngôch dak Cộng hòa Nhân dân Trung Hoa ta Việt Nam tât ntĭnh sĭt lĕ năm kan ta Việt Nam.

Ta rơh wơt, Kruanh dak Tô Lâm lah rjăp hun hao tâm boh đah Trung Quốc way lah trong nchrăp mô rgâl, trong sơch têh jong, an ƀư lor bôk năp tâm gung trong tâm boh dak bah dih đăp mpăn nsrôih ndôr êng, âk ding, âk trong bah Việt Nam. Đại sứ Hùng Ba lah rjăp, lôch dŭt jêh năm kan, bol ta moh ntŭk gŭ kan, mbra way tĭng groi nđôi n’hanh rgop uĕh an tâm boh kâng n’har tâm rnglăp. Ndrel tâm kơl trong rêh jêng let năp đah Việt Nam - Trung Quốc geh nkô̆ hôr têh jong. Nkô̆ nău dak lêng, bar ding tâm ban ŭch tĭng ƀư lhăt jăp ăp nău tâm ton n’hanh nău gĭt nsum gưl têh, mât njrăng n’hanh nkah uĕh lơn nău tâm rkeh, mô an nkô̆ nău dak lêng khuch tât tâm boh bar dak hun hao uĕh lăng, rgop an đăp mpăn, bah tâm lơh tâm su, hun hao bah nkual n’hanh lam ntŭr neh.