Kêng măng 18/1, ta ntŭk kan Kruanh dak, Kruanh dak võ Văn Thưởng hŏ mâp măt 50 nŭih ntoh lư, ntoh măt ân ăp nŭih kan bah năm 2023 tâm Bôk nau kan “Nau kan ueh” bah ntŭk kan ntoh rup Việt Nam. Ntơm ntoh klơ sóng Đài truyền hình Việt Nam ntơm năm 2014 tât rnôk aơ, bôk nau kan “Nau kan ueh” hŏ mbơh nkoch rlau 2.200 nau nkoch tât nau ueh dơi geh rêng lam tât ăp ntŭk ntoh rup, ndâk rup gui ueh mpeh kon nŭih, neh dak Việt Nam ueh, geh nuih n’hâm rŏng nŭih.

Kruanh dak lah rjăp, ăp nau nkoch bah bôk nau ntoh rup “Nau kan ueh” bah ntŭk kan ntoh rup Việt Nam hŏ mbơh, nkoch rêng leo tât ăp nau ueh, geh nau khlay mpeh nau bonh đă, nkoch trêng dŭt prêh ueh. Kruanh dak ŭch bôk nau kan “Nau kan ueh” mra dơi joi âk nŭih, âk nau ntoh lư, âk nau kan ueh tâm lam nkuăl neh bah neh dak, gay dơi geh rnê, pơk hvi ăp nau kan ueh geh rêng tât lam kon nŭih tâm lam dak. Tă bah nê ntrŭt đă nsum mpôl ƀư nau kan, rgop n’hâm ndâk njêng rup gui kon nŭih, neh dak Việt Nam ueh, âk nau ŭch rŏng kon nŭih./.