Hăn pah kan tay ta ăp n’gor tâm nkual duyên hải Nam Trung Bộ, tâm nar 4/3, Kruanh Quốc hội Vương Đình Huệ hŏ pah kan đah tỉnh ủy n’gor Bình Định. Năm 2024 n’hanh tâm 3 năm bôk năp an ƀư Nghị quyết Đại hội Đảng ăp  gưl,  n’gor  Bình Định hŏ  rgum an tĭng ƀư lĕ n’hâm suan, ăp kôp ăp trong nkra hun hao wăng sa- rêh jêng kon nuĭh, đăp mpăn njrăng n’gang neh dak- rnă  njrăng,  rdâk  njêng lam trong kan chính trị ta ntŭk  n’hanh hŏ geh ăp nău dơi uĕh. Tât aƀaơ geh 16/22 rnoh tât kan khlay bah năm  kan 2020 - 2025 tât n’hanh rlău trong nchrăp ndơ̆ luh.

Lĕ rngôch ndơ geh ƀư ta n’gor  hao 7,6%, dâk tâl 17/63 tâm lam dak. Rnoh têh wăng sa geh tât rlău 117.000 rmen prăk, dâk  tâl  5/14 tâm nkual miền Trung... Lah ta rơh pah kan, Kruanh Quốc hội Vương Đình Huệ rnê  âk ăp nău dơi hŏ geh ma n’gor Bình Định hŏ  tât dơi rgop n’hao  wăng sa dâk hao tay n’hanh  hun hao, dâk  tâm rmôt dâk bôk năp bah lam nkual.  Tâm let năp tay, n’gor Bình Định nsrôih tât năm 2030 jêng n’gor hun hao mpeh rmôt dâk bôk năp  lam nkual Bắc Trung Bộ n’hanh duyên hải Trung Bộ; ntŭk rgum têh bah lam dak mpeh hun hao wăng sa dak lêng;  ntŭk rgum tơm pâl  nđaih  neh dak. Kruanh Quốc hội dăn đă n’gor Bình Định nsrôih, ƀư lôch jêh dŭt âk ăp rnoh tât kan, nău dơn kan hŏ ndơ̆ luh;  mpŏng n’hanh nsing nơm an lah, Đảng bộ, n’gâng kan n’hanh ƀon lan n’gor Bình Định mbra mpư n’hao nuih n’hâm dơn kan n’hanh suan dăng “Tây Sơn”, ơm tĭng ƀư jêng ngăn ngăn rnoh tât năm 2030, Bình Định jêng n’gor  hun hao  mpeh rmôt dâk bôk năp nkual  Bắc Trung Bộ n’hanh duyên hải Trung Bộ.

Tâm rơh hăn khâl dja, Kruanh Quốc hội Vương Đình Huệ hŏ rgŏ jă  Tổng công ty Hàng hải Việt Nam ntop kơl n’gor Bình Định ƀư 100 mblâm jay tâm  rŏng đah rnoh khlay 5 rmen prăk./.