Tâm khuh n’gôr nchrăp wơt du năm mhe n’hanh nkah ndray nar njêng Đảng cộng sản Việt Nam, ôi 29/1, ta Jay Quốc hội, Kruanh Quốc hội Vương Đình Huệ hŏ mâp măt kruanh rđău kan ơm Quốc hội; Ủy viên Ủy ban Thường vụ Quốc hội ơm. Ta rơh mâp măt, kruanh rđău kan Quốc hội ơm an lah, Quốc hội khóa 15 mpơl tay nuih n’hâm rgâl mhe ta ăp trong kan, rgum nchră Quốc hội, dăch đah cử tri n’hanh dơi cử tri, âk mpưm nuĭh ƀon lan rnê âk.

Nhih pah kan bah Quốc hội lor nchrăp kan nsum tâm râp jôn rbăn đah Chính phủ yor  nău ŭch tât geh nsum, tâm di đah trong rƀŏng hun hao tâm dak n’hanh lam ntŭr neh. Nkhêp geh nchrăp wơt Tết Nguyên đán Giáp Thìn 2024, Kruanh Quốc hội Vương Đình Huệ mbah rhơn ăp kruanh rđău  kan Quốc hội ơm, Ủy viên Ủy ban Thường vụ Quốc hội ơm ăp khóa ndrel rnăk wâl, du năm mhe đăp mpăn, n’hâm suan ngăch dăng n’hanh rhơn răm; ntop kơl tay, rgop âk lơn gay Quốc hội ƀư lôch jêh uĕh nău dơn kan hŏ dơi Đảng n’hanh ngih dak jao./.