Nkhêp di Lam ntŭr neh bu ur 8/3 n’hanh ntơm rdâk lơh Hai Bà Trưng, kêng măng nđaơ (7/3), ta Ngih Quốc hội, Kruanh Quốc hội Vương Đình Huệ mâp măt bu ur ĐBQH pah kan rnâng kan ta Trung ương n’hanh bu ur ntĭm rđău, mât uănh gưl vụ bah Văn phòng Quốc hội, ntŭk mĭn njêng lập pháp.

Ntoh ngơi ta nar mâp măt, Kruanh Quốc hội Vương Đình Huệ uănh lah prêh mĭn ƀư mhe bah Mpôl pah kan đại biểu, rmôt nghị sỹ bu ur lĕ tâm rgop ƀư âk nău kan an oh yuh bu ur. Kruanh Quốc hội lah rjăp, ăp năm kan Quốc hội n’hanh bah bôk  nău kan Quốc hội khóa 15 tât aƀaơ, Quốc hội geh nău mĭn joi, rgâl mhe geh săk rnglăy lĕ rngôch.

Tâm săk rnglăy nĕ, geh nău ƀư tơm bah bu ur ĐBQH, ăp oh yuh tâm ăp ngih pah kan bah Quốc hội. Lơn lah, năm kan Quốc hội khóa 15 geh rnoh ĐBQH bu ur âk ngăn tâm 10 năm kan dăch aơ, geh 30,26%, rnoh aơ dơi nghị viện ăp dak uănh lah prêh. Kruanh Quốc hội nsing nơm an lah, ăp bu ur ĐBQH mbra mât uĕh tay âk săk rnglăy lĕ dơi geh, ăp nău rgop lơn tay tâm nău ƀư bah Quốc hội, ndrel ƀư jêng nău geh têh kuăng gay ƀư uĕh tay nău way ơm uĕh ang n’hanh rƀŏng tât nkah gĭt 80 năm Quốc hội Việt Nam.