Ôi 21/11, Đại hội đồng AIPA – 43 đah nkô̆ "ndrel rgâl mhe yor du ASEAN nsrôih êng, nkrum lam n'hanh jŏ jong" ntơm pơk ngăn ta Thủ đô Phnom Penh.

Aơ lah Đại hội đồng lor bôk năp bah AIPA dơi ƀư tĭng trong mâp na nê̆ lôch rlău 2 năm nuh srê Covid – 19. Đại hội đồng AIPA - 43 rgum tâm nchră ăp nkô̆ nău mpeh: Đăp mpăn, rnă njrăng, trong kan âk ding n'hanh nău khlay ƀư rgum tơm bah ASEAN; n'hao dăng tâm boh tâm rnglăp nghị viện mpeh rnă njrăng nchuăn rdeng dak lêng, ntrŭt ntrôl đăp mpăn ta nkual Đông Nam Á; Ntrŭt ntrôl tâm boh nghị viện yor ma nău hun hao wăng sa nkrum lam n'hanh nâp dăng ma trong tât tâm boh mpeh ntŭk gŭ rêh, kon nuĭh n'hanh mât bôk kan; N'hao nău dơi kan an ăp doanh nghiệp jê̆, dŭt jê̆ n'hanh dah găp tâm ndơ̆ rgâl kỹ thuật mbrô n'hanh ntrŭt ntrôl pâl nđaih, dâk hao tay wăng sa; N'hao dăng rgâl kỹ thuật mbrô gay mât njrăng nău rêh lam lĕ rngôch; N'hao dăng mât njrăng n'hâm suan rêh jêng kon nuĭh gay nkra ăp ntul rlong tâm ASEAN; Tâm ban bu ur bu klô n'hanh ntăm nău dơi an bu ur yor ma nău dâk hao tay nâp dăng, nkrum lam n'hanh nsrôih ndôr êng lôch bah nuh srê COVID-19; N'hao nău khlay kan bah bu ur nghị sĩ tâm nău ntrŭt ntrôl bôk nău kan nchrăp lor dăn đă mpeh bu ur, đăp mpăn n'hanh rnă njrăng; ntik uĕh nău râng bah druh ndăm yor du nsum  mpôl ASEAN têh ndrŏng n'hanh hun hao nâp dăng.

VOV/Nuĭh rblang: Điểu Thân