Ôi 12/1, ta Jay Quốc hội, Kruanh Quốc hội Trần Thanh Mẫn ƀư tơm Rơh hop tâl 53 bah Ủy ban Thường vụ Quốc hội.  Lah ntơm pơk rơh hop, Kruanh Quốc hội Trần Thanh Mẫn an gĭt, aơ lah rơh hop lor bôk năp bah khay 1/2026, rơh hop ƀư tâm rnôk lam dak dôl rhơn nđơr mbah rhơn wơt Đại hội Đảng lam dak tâl 14 n’hanh Nkah ndray 96 năm nar njêng Đảng Cộng sản Việt Nam; wơt Tết way ơm bah rnoi nuĭh.

Ta rơh hop, siƀŭt mbơh bah Ủy ban Dân nguyện n’hanh Groi nđôi an gĭt, cử tri n’hanh ƀon lan mpơl tay nău nsing nơm tâm nău rđău kan bah Đảng tâm nău ndơ̆ neh dak hun hao, tĭng ƀư geh nău dơi ăp rnoh tât kan; rnê âk nău kan nsum đah Quốc hội n’hanh Chính phủ tâm nău rdâk njêng luật, n’gluh an dŏng trong kơl n’hanh an tĭng ƀư, njêng geh nău tâm ban ŭch, geh nău tam tâm mât bôk kan ngih dak. Kruanh Quốc hội đă Ủy ban Dân nguyện, groi nđôi, ndrel ăp n’gâng kan tĭng groi nđôi rnoh khlay ndơ dŏng sa khlay tâm rnôk Tết Nguyên đán Bính Ngọ gay mhâm ƀư đăp mpăn, ăp tŏng an nuĭh ƀon lan; uănh khlay nô nău rnă njrăng, chính trị, rĭng grep lam rêh jêng kon nuĭh bah năp, tâm, bah kơi Đại hội Đảng n’hanh Tết Nguyên đán.