Rƀŏng tât nkah ndray 80 năm Nar njêng Tahen ƀon lan Việt Nam, 35 năm Nar lam ƀon lan njrăng n’gang neh dak, ôi 17/7, Kruanh Quốc hội Trần Thanh Mẫn khâl n’hanh pah kan đah Quân khu 3.

Ta rơh pah kan, Kruanh Quốc hội Trần Thanh Mẫn rnê ăp nău dơi geh, nău rgop khlay bah mpôl tahen lam dak, tâm nê geh mpôl tahen Quân khu 3 tâm nău dơi nsum bah neh dak; mpôl tahen Quân khu 3 hŏ ƀư jăp pah kan rdâk  njêng, mât njrăng nkual trôk, nkual  dak lêng bah neh dak, nsĭt tay nău rêh đăp mpăn an ƀon lan. Mpeh nău dơn kan let năp tay, Kruanh Quốc hội Trần Thanh Mẫn dăn đă Quân khu 3 an ƀư tay jăp lơn đŏng Nghị quyết đại hội Đảng lam dak tâl 13, an ƀư jăp nghị quyết bah Quân ủy Trung ương tâm ban kơt nău dơn kan tahen, njrăng n’gang neh dak năm 2024. Kruanh Quốc hội lah rjăp, đah nuih n’hâm “tahen n’hanh ƀon lan tâm ban dak ma ka”, ndrel đah mpôl công an, mpôl tahen way lah ngoăy tâm ăp đơn vị lor bôk năp geh măt gay kơl ƀon lan njrăng, n’gang n’hanh nkra bah khuch khat trôk nar lơh mô kă rnam măng,  nar.