Tĭng rơh hop, lôch rnôk dŭt jêh Rơh hop tâl 7, Quốc hội khóa 15, ôi 1/7, Kruanh Quốc hội Trần Thanh Mẫn n’hanh mpôl đại biểu Quốc hội n’gor Hậu Giang hŏ mâp cử tri ta Hội trường ntŭk rgum nchră n’gor Hậu Giang n’hanh buăt nthoi 3 bôk ƀoh nkual ƀon têh Ngã Bảy, nkuâl Châu Thành, Châu Thành A.

Lah ta rnôk mâp, Kruanh Quốc hội Trần Thanh Mẫn hŏ mbơh  mpeh lôch jêh bah Rơh hop tâl 7, Quốc hội khóa 15, tĭng nê ăp trong nchrăp luật, trong nchrăp nghị quyết dơi Quốc hội mĭn uănh, an dŏng ta rơh hop dja geh tât âk n’gâng kan, âk trong kan, dơi cử tri, ƀon lan lam dak  uănh khlay, tĭng groi nđôi. Kruanh Quốc hội Trần Thanh Mẫn an gĭt, tâm nar 1/7, 10 luật geh tât nuĭh ƀon lan mbra geh nău tam; njrăng uănh, ăp Luật rnôk dơi n’gluh an dŏng ân geh nghị định, thông tư hăn nkre gay tĭng ƀư dĭl. Tĭng Kruanh Quốc hội, âk ntŭk aƀaơ nha hôm geh nău cán bộ tâm nje, der jêng tât nău ndrel nghị định, thông tư, nău an ƀư rhŏ dŏng hun hao mô dơi tĭng ƀư tâm ban đah ăp n’gor. Kruanh Quốc hội dăn đă ân tĭng ƀư jăp, ăp  grep bah pháp luật tâm rđău đă, ƀĭt juet nău kan gay ntik n’hao nuih n’hâm đăt ndal, nănh mĭn, nănh ƀư yor ma nău geh nsum.