Kêng măng ntri (18/12), Kruanh Quốc hội Trần Thanh Mẫn hŏ pah kan đah kruanh nkual ƀon têh Hải Phòng gay djăt siƀŭt mbơh nău tĭng ƀư sơ kết Nghị quyết mbrô 35 nar 13/11/2021 bah Quốc hội mpeh rlong du đêt trong đă tĭng, trong kơl mha êng hun hao nkual ƀon têh Hải Phòng.

Lah n’glôch jêh rơh pah kan, Kruanh Quốc hội Trần Thanh Mẫn an lah, Hải Phòng geh âk dơh uĕh, Trung ương hŏ n’gluh an âk trong nchrăp, trong kơl khlay ntăm jâng an nău hun hao bah nkual ƀon têh tâm rơh mhe. Rnê âk ăp nău dơi ma nkual ƀon têh Hải Phòng hŏ dơi geh tâm nău tĭng ƀư Nghị quyết 35, ntoh lư lah kơi ntop rnoh tât kan bah ngân sách, tâm pă gưl dăp rgum n’hao geh an cán bộ, công chức, Kruanh Quốc hội an gĭt nău dja an saơ ăp nău n’glêh an bah Đảng, Quốc hội, Chính phủ lah di ngăn. Tâm let năp tay, Kruanh Quốc hội Trần Thanh Mẫn nkah an nkual ƀon têh Hải Phòng ân ra uănh tay na nê̆ ăp trong tĭng, trong kơl hŏ geh tâm Nghị quyết mbrô 35 gay rgâl nkra, kơi ntop kơt ŭch đăt ndal lơn ri ân ƀư geh rgum tơm, di nkô̆, ăp ntil glo tơm gay đăt ndal nsan hao.