Di 5h40 mnĭt kêng măng 12/4, Kruanh Quốc hội Vương Đình Huệ n’hanh Mpôl đại biểu gưl têh dak he hŏ hăn tât tach ndeh păr Nội Bài, dŭt jêh uĕh lăng hăn khâl ngăn dak CHND Trung Hoa ntơm bah nar 7-12/4/2024. Hăn khâl ngăn dja hŏ geh rlău 40 nău kan gưl  têh n’hanh âk nău kan bah meng âk mpưm ƀư ta nkual ƀon têh Bắc Kinh, nkual ƀon têh Thượng Hải n’hanh n’gor Vân Nam.

Lah kruanh rđău kan n’gâng tơm bah Đảng n’hanh Ngih dak, hăn khâl bah kruanh Quốc hội Vương Đình Huệ mô dơn rgop tâm  boh đah bar nhih pah kan njêng pháp luật ma hôm an lĕ rngôch bah tâm boh bar Đảng, bar dak  ta âk trong kan bah chính trị, rnă njrăng- njrăng n’gang neh dak, tâm boh ngăn ngăn, lơn lah wăng sa-  tăch rgâl, buăt nthoi  ntung trong, kan nsum âk ntil, tâm nđŭr ƀon lan bar dak.

Đah âk nău dơi âk mpưm, ngăn ngăn, hăn khâl ngăn Trung Quốc bah Kruanh Quốc hội Vương Đình Huệ lah njuat hăn tay mhe tâm boh bar dak, mpơl nău rgop khlay, ngăn ngăn bah nhih pah kan njêng pháp luật đah nău hun hao nkrum lam  tâm boh bar Đảng, bar dak Việt Nam – Trung Quốc.