Gŭ khâl tay Trung Quốc, ôi 10/4, Kruanh Quốc hội Vương Đình Huệ hŏ tât khâl n’hanh pah kan ta nkual ƀon têh Thượng Hải.

Kruanh Quốc hội Vương Đình Huệ mpơl nău rhơn rnôk tât khâl Thượng Hải, nkual ƀon têh hvi mô hŏ tât 0,1% rnoh neh bah Trung Quốc yơn lah nkual ƀon têh dŭt âk nuĭh, rnoh âk GDP têh n’hanh dâk lor bôk năp tâm trong rgâl dơh glêh, pơk mpông, blău njêng mhe khoa học bah Trung Quốc.

Aơ lah ntŭk ma Tổng Bí thư, Kruanh Tập Cận Bình n’gluh nău mĭn mpeh jâng nsing geh nău tâm ban ƀon lan ƀư tơm rloh rlău du bông hun hao n’hanh tĭng ƀư nău mĭn dja, ăp ntŭk rgum kan way uănh khlay nău rgum âk nău rgop bah ăp rơh kơn ƀon lan tâm rnôk rdâk njêng luật pháp. Râng tâm nchră đah ăp nuĭh gĭt blău n’hanh nuĭh ƀon lan ta ntŭk mpeh rdâk njêng luật pháp, Kruanh Quốc hội Vương Đình Huệ nkoch nău tă ơm gĭt kan bah Việt Nam tâm nău sŏk nău rgop rdâk njêng Luật, êng kơt Luật neh ntu (rgâl nkra) hŏ geh rlău 12 rkeh nău rgop. Kruanh Quốc hội an gĭt mbra ôp uănh nău tă ơm gĭt kan bah Trung Quốc n’hanh lah rjăp Quốc hội Việt Nam mbra mô an geh du nău rgop bah nuĭh ƀon lan, doanh nghiệp, bah đại biểu Quốc hội njuăl tât ma mô dơi ơh rblang na nê̆./.