Nthoi tay bôk nău kan khâl na nê̆ Trung Quốc, kêng măng 11/4, ta nkual ƀon têh Côn Minh, Kruanh Quốc hội Vương Đình Huệ lĕ rgum nchră wa Vương Ninh, Ủy viên Trung ương Đảng Cộng sản Trung Quốc, Bí thư N’gor ủy Vân Nam, Chủ nhiệm Ủy ban thường vụ Nhân đại n’gor Vân Nam.

Ta rgum nchră, 2 kruanh uănh lah dŭt n’hâm mpeh ăp hun hao bah tâm boh 2 Đảng, 2 dak Việt Nam-Trung Quốc năm bah năp, tâm rgâl ăp trong mkra gay mât nău geh, nău dăng bah 2 ding, ntrôl lơn tay tâm boh kan ndrel đah ăp n’gâng kan, ƀon lan Việt Nam đah n’gor Vân Nam năm tât.

Kruanh Quốc hội Vương Đình Huệ mĭn lah nău ntrŭnh ngăn bah Đảng, Ngih dak Việt Nam mpeh nău ƀư jru n’hanh n’hao tâm boh dăch dêh Việt Nam-Trung Quốc geh nkô̆ têh khlay. Kruanh Quốc hội mpŏng 2 ding tâm rgop rjăp tâm trong kan mât uănh, mât njrăng n’har bri tĭng 3 sam ƀŭt khlay mpeh n’har bri ta neh kơh n’hanh ăp tâm ton geh tât, tâm rgop mkra đăp mpăn ăp nău hôm e n’hanh nău ntoh mhe ta nkual n’har bri, ndâk ƀư trong n’har bri đăp mpăn, tâm rnglăp.