Kêng măng 8/4, ta Đại lễ đường Nhân dân, Thủ đô Bắc Kinh, Trung Quốc, Ủy viên trưởng Ủy ban thường vụ Đại hội đại biểu ƀon lan lam dak Cộng hòa Nhân dân Trung Hoa hŏ ƀư tơm rơh wơt n’hanh tâm nchră đah kruanh Quốc hội Vương Đình Huệ.

Bar ding tâm ban ŭch ntrŭt ntrôl an ƀư geh nău tam “Nău mbơh nsum mpeh nău ƀư jru hvi n’hanh n’hao têh tâm boh têh jong lam lĕ rngôch, rdâk njêng mpôl tâm pă trong hăn let năp tay Việt Nam - Trung Quốc geh nkô̆ hôr têh jong”; ntik nău khlay kan bah Quốc hội n’hanh Nhân đại tâm nău ntrŭt ntrôl tâm boh đah bar dak. Kruanh Quốc hội Vương Đình Huệ dăn đă bar ding ntrôl dăng buăt nthoi hun hao têh jong, n’hao lơn đŏng săk tam, nsĭt geh nău dơi tâm boh ta ăp trong kan. Kruanh Quốc hội Vương Đình Huệ ŭch rŏng bar ding ndrel rdâk njêng rup gui ntuh kơl mhe bah ăp doanh nghiệp têh, geh nău nsing nơm, công nghệ bah Trung Quốc ta Việt Nam.

Lôch jêh tâm nchră, Kruanh Quốc hội Vương Đình Huệ n’hanh Ủy viên trưởng Ủy ban Thường vụ Nhân đại Trung Quốc Triệu Lạc Tế hŏ ký siƀŭt nchih nkah tâm boh đah Quốc hội Việt Nam n’hanh Đại hội Đại biểu ƀon lan lam dak CHND Trung Hoa.

Tâm nar ntri đŏng, Kruanh Quốc hội Vương Đình Huệ wơt kuanh rđău kan du đêt Tập đoàn dâk bôk năp tâm trong kan ƀư ntung trong, trong loih, ŭnh nar bah Trung Quốc; khâl Ntŭk rgum gŭ mĭn n’hanh Hun hao bah Tập đoàn Huawei.