Ôi 22/11, tâm rnôk khâl na nê̆ dak Campuchia, Kruanh Quốc hội Vương Đình Huệ n’hanh Mpôl đại biểu gưl prêh Quốc hội dak he lĕ wơt Groi  kruanh n’gor Kampong Thom; khâl, pah kan đah ăp công ty mpeh tâm Tập đoan Cao su Việt Nam ta n’gor Kampong Thom, dak Campuchia. Ta nar khâl, pah kan đah Công ty cao su Tân Biên, Kruanh Quốc hội Vương Đình Huệ nkoch nău răm rhơn rnôk hăn rlău ăp bri cao su uĕh nđĭr, têh hvi. Nău uĕh nĕ an saơ nău rêh uĕh an nău tâm boh 2 dak Việt Nam n’hanh Campuchia.

Kruanh Quốc hội pah kan đah công ty cao su

Kruanh Quốc hội lah rjăp, ăp săk rnglăy uĕh lĕ dơi geh rlău ma nău nsrôih bah Mpôl kruanh n’hanh nsum mpôl cán bộ phung pah kan Công ty hôm an lah tât nău kơl, ntop an, tâm rgop, nta an bah Chính phủ Hoàng gia Campuchia, ma na nê̆ n’gâng kan n’gor Kampong Thom. Nkhêp di rơh aơ, Kruanh Quốc hội uănh lah prêh n’hanh ngăn ngên lah uĕh n’gâng kan n’gor, ăp n’gâng kan, nău kan n’gor, nkuăl lĕ kơl nta nơih an nău kan bah Công ty.