Nar naơ 22/11, mpôl đại biểu Quốc hội n’gor Dak Lak ƀư rơh rƀŭn nchră tâm mâp ƀon lan lôch rơh rƀŭn nchră tal 4, Qh khóa 15. Bí thư Trung ương Đảng, kruanh rnâng kan dân vận Trung ương Bùi Thị Minh Hoài lĕ tâm mâp ƀon lan ta nkuăl Cư M’gar n’hanh nkuăl ƀon têh Buôn Ma Thuột.

Ta ăp ntŭk tâm mâp,ƀon lan mpơl nău rhơn ta năp nău geh ta rơh rƀŭn nchră tal 4, QH khóa 15. Ngăn lah, Quốc hội lĕ geh mbơh tơih Nghị quyết mpeh rlong ƀư du đê̆ nău kan, nău kơl ơm gay ma hun hao nkuăl ƀon têh Buôn Ma Thuột. Ta rơh tâm mâp, ƀon lan lĕ dăn đă ăp nkô̆ nău geh tât nău kơl an nuĭh geh kan, rmal ăp nău kan rdâk njêng tih, bảo hiểm y tế an rnăk ach o, nău phân poh rlăm mô nâp ueh khuch tât nău geh ueh bâh tơm tăm, trong hăn ta nkual ƀon lan lĕ mô hôm ueh an geh mât ntuh kơl n’hao nău nkra mhe.