Ôi ntri 6/3, Kruanh Ủy ban Trung ương Mặt trận Tổ quốc Việt Nam Đỗ Văn Chiến ndrel mpôl pah kan hŏ geh rơh pah kan đah rnâng kan Tỉnh ủy Điện Biên mpeh trong nchrăp kan nsum n’glôch jêh tĭng ƀư Đề án rgŏ jă ntop kơl ƀư jay tâm rnglăp an rnăk ach o rƀŏng tât nkah ndray 70 năm lơh dơi Điện Biên Phủ; Trong nchrăp ƀư nău kan mpư rnê, nkah gĭt ăp tahen ơm khĭt râng tâm lơh na nê̆ Điện Biên Phủ ta Điện Biên.

Tĭng trong nchrăp, n’glôch jêh tĭng ƀư Đề án rgŏ jă ntop kơl ƀư jay tâm rnglăp an rnăk ach o bah n’gor rƀŏng tât nkah ndray 70 năm lơh dơi Điện Biên Phủ mbra dơi ƀư tâm n’gul khay 3/2024. Nkô̆ n’glôch jêh mbra uănh năl jêh geh tĭng ƀư Đề án 09; lễ jao an 5.000 mblâm jay tâm rnglăp an rnăk ach o bah n’gor; mpư rnê, nkhôm an ăp mpôl, ăp nuĭh geh nău dơi ntoh lư tâm rơh rgŏ jă, kơl an n’hanh tĭng ƀư Đề án 09. Ta rơh pah kan, wa Đỗ Văn Chiến dăn đă n’gor Điện Biên rgâl di du đêt nkô̆ tâm trong nchrăp ƀư, lah: rgâl di tay bôk nău kan bah tâm nđŭr đah ƀon lan jêng sơch nuĭh ntơh măt gay tâm nkoch ta rơh mâp măt; kơi ntop tay bôk nău kan tâm nđŭr văn nghệ tâm lễ nkah gĭt; rgâl mpeh rnoh têh âk nuĭh ntơh măt tĭng nău geh ngăn ngăn./.