Ta rơh rƀŭn nchră, N’gâng kan leo kan tahen n’gor lĕ geh mbơh ăp nău ntrŭnh bâh n’gâng kan mât rnă njrăng ngih dak n’hanh n’gâng kan Tổng tham mưu mpeh nău leo ƀư kan, ntrŭnh tay rmôt kan  leo kan, nău kan ta rnâng kan leo kan tahen gưl xã, nkre lah pă kan,săch kan an 124 sĩ quan mât ƀư kruanh rnâng kan leo kan tahen 124 xã, phường, đặc khu n’hanh bơi tât 500 sĩ quan, tahen way kan mât ăp nău kan groi chỉ huy, chính trị viên phó kơl kan,  tahen way kan. Nău pă leo kan, pă nuĭh kan lah nău khlăy ngăn tâm rnôk mbơh ƀư nău kan n’gâng kan ta ntŭk 2 gưl, gay ma rdâk njêng mpôl kan tahen ueh jăp, săk rnglăy, dăch ta ntŭk. Nkre lah đă mpôl cán bộ, geh săch kan ngăch đăp mpăn nău leo kan, leo mbơh nău, ntop mât nâp rnă njrăng ngih dak- rnă njrăng ta ntŭk.