Ta Lâm Đồng, 3 nău nchrăp ƀư trong têh hăn ngăch khlay lam dak dôl dơi mbơh ƀư dŭt ndăn. Nău nchrăp ƀư trong têh ngăch Tân Phú-Bảo Lộc, tĭng kan ndrel nsum êng, geh dĭng lĕ jong 66 km, tâm nĕ lvang rlău n’gor Lâm Đồng jong 55 km, ntơm ƀư lơ 19/12/2025. Trong kan sŏk neh dơi ƀư bah khay 10 năm 2025.  Tât aƀaơ, n’gor lĕ uănh an trok tâm an 590/898 rnăk geh khuch.

Đah nău nchrăp ƀư trong têh hăn ngăch Bắc-Nam mpeh bah lơ nhâp nar, lvang Gia Nghĩa-Chơn Thành geh dĭng lĕ jong bơi 129 km, tâm nĕ lvang n’gor Lâm Đồng jong rlău 23 km lĕ geh 135/152 rnăk dơi uănh an trong trok tâm, nchrăp jêh tâm khay 1/2026. Đah trong têh hăn ngăch Bảo Lộc-Liên Khương, jong 74km, lĕ geh 2.347 samƀŭt rhăch nău 2.464 samƀŭt rhăch nău dơi uănh an trok tâm. Kơp nsum lĕ 3 nău nchrăp ƀư, rnoh samƀŭt rhăch nău trok tâm neh dơi uănh an trok tâm lĕ geh rlău 87%.