Năm 2022, dĭng lĕ trong nchrăp prăk ntuh kơl nsum bah n’gor Lâm Đồng dơi pă lah bơi 6.500 rmen prăk gay ƀư 350 nău nchrăp ƀư. Tâm nĕ, geh 722 rmen prăk lah tơm prăk jŏ jong bah năm 2021 jao an.

Tĭng wa Bùi Sơn Điền, Giám đốc N’gâng kan Kế hoạch n’hanh Đầu tư n’gor Lâm Đồng, kơp tât nar 15/11, trong nchrăp prăk ntuh kơl nsum năm 2022 bah n’gor mhe an pă geh 3.694 rmen prăk, geh 68,5% trong nchrăp. Nău pă an prăk mbrơi tă bah mâp âk jêr jŏt, wăk kol tâm mkra sŏk neh lâng n’hanh ăp sam ƀŭt hành chính. Aƀaơ ntŭk kan dôl nsrôih tâm rgop đah ăp ngih pah kan dơi kan bah n’gor ntrŭt ăp nuĭh tơm ntuh kơl ngăch ƀư. Nsrôih tât nar 31/12 tât geh rnoh pă an prăk rlău 95% n’hanh tât lĕ 1/2023 geh 100% trong nchrăp.

“Mpôl hên pah kan đah ăp nuĭh tơm ntuh kơl, đah ăp ntŭk an lah mâp dŭt âk jêr jŏt. Yơn lah, tĭng nchroh mbơh n’hanh tĭng tâm ton bah ăp nuĭh tơm ntuh kơl ri lĕ rngôch mbra pă an tĭng ngăch ƀư. Rnoh prăk ƀa ƀă dŭt âk tâm rnôk mông nar ƀư knŭng hôm rlău 1 khay tay dơm, yor rĭ mpôl hên lĕ geh pah kan, điện thoại  ntrŭt đă, nkah ntĭnh. Du đêt nău nchrăp ƀư mbrơi ngăch ƀư lĕ geh mbơh đŏng đah UBND n’gor”.

         Lâm Đồng dôl rgum ntrôl ngăch pă an prăk ntuh kơl nsum

Dôl uănh ngăn, ăp nău nchrăp ƀư geh tơm prăk pă an mbrơi geh tâm ăp ndơ ƀư tă bah ăp n’gâng kan, nău kan bah n’gor ƀư tơm ntuh kơl. N’hêl na nê̆, N’gâng kan Thông tin n’hanh Truyền thông dơi pă 22 rmen prăk yơn knŭng mhe aơ pă an geh 28%, N’gâng kan Tuch tăm mât rong n’hanh Hun hao ƀon lan pă 224 rmen prăk mhe ƀư pă an geh 23%, Ngih dak si Đa khoa n’gor dơi pă 12 rmen prăk yơn knŭng mhe pă an geh 11%...

          Ta năp nău prăk ntuh kơl nsum ta n’gor pă an dŭt mbrơi, wa Trần Văn Hiệp, Kruanh UBND n’gor Lâm Đồng an gĭt mbra nsrôih mkra rjăp đah ăp nuĭh tơm ntuh kơl lah mô tŏng ăp pă an prăk tĭng di trong nchrăp.

“Pă an prăk ntuh kơl nsum bah n’gor dŭt âk vĭ vĕ, mbrơi tâm trok tâm sŏk neh lâng, du đêt ndơ ƀư di lah lĕ ƀư hôm yơn aƀaơ mô hŏ dơi ƀư. Tâm nĕ, nău pă an prăk bah du đêt nău kan hôm e nkân dŭt âk, an rhoăt nău blău ơm n’hanh mô dơi an geh tay. Nău mĭn êng lah mĭn lah tât dŭt năm, ntŭk kan mô pă an prăk ri đă rhoăt prăk n’hanh mô hôm an tay, kđôi ndơ ƀư n’gul gâl. N’hanh trok dơn sĭt đah kruanh n’hanh giám đốc ăp n’gâng kan, nău kan”.