Khay bah năp, Công an n’gor Lâm Đồng lĕ rmal hang rbăn nuĭh tih, ntơm jêng bên lĕ ngêt ndrănh bia mô ƀĭt ndeh hăn trong tâm ntŭk gŭ rêh. Bah bôk năm tât aƀaơ, Công an n’gor Lâm Đông rgum trong kan ƀư uănh nđôi, groi uănh ta ăp trong têh, jêr jŏt, saơ, ƀư sam ƀŭt rmal rlău 2.700 nuĭh tih ngêt ndrănh bia.

Tĭng đại tá Lê Văn Xuyên, Kruanh jrô kan Rnă njrăng chính trị nội bộ, Công an n’gor Lâm Đồng, đah trong way ƀư mô an ntlơi du hê, mô geh ntŭk mô an, rmôt CSGT ăp ntŭk tâm n’gor lĕ nsrôih rmal ăp nuĭh tih. N’gor ủy, UBND n’gor lĕ an âk săm ƀŭt ntĭm rđău, đă rmal kỷ luật rjăp mpeh Đảng n’hanh n’gâng kan ƀon lan đah ăp nuĭh tih lah cán bộ, đảng viên, công chức, viên chức, nuĭh pah kan bah ngih pah kan, ntŭk kan, ƀon lan tâm n’gor.

Nău rmal rjăp ăp nuĭh lĕ ngêt ndrănh bia yơn hôm e ƀĭt ndeh hăn trong, Ntlơm lĕ dơi wât tĭng ăp nău ntrŭnh n’hanh luật lệ ntung trong bah nsum mpôl, rgop n’hŭch 15% rnoh prah tâm tom ndeh geh tât ngêt ndrănh ta n’gor Lâm Đồng.