Nsing ta nău ra uănh tay ăp tŏng, uănh năl lam lĕ rngôch rmôt cán bộ, công chức, viên chức, ăp nhih pah kan, đơn vị, n’gâng kan tâm dâng, n’gor Lâm Đồng hŏ tĭng ƀư dăp rgum, đă n’hao, tâm pleh cán bộ tĭng trong rƀŏng di nuĭh, di nău kan, di ntŭk gŭ. Nău tâm pă cán bộ mô dơn nsing tâm bằng cấp, jŏ năm pah kan ma hôm uănh khlay nău dơi kan ngăn ngăn, nuih n’hâm dơn kan n’hanh nău yach ngăch kan. Âk cán bộ mom, geh nău blău kan, nău mĭn rgâl mhe, nănh mĭn, nănh ƀư hŏ dơi nsing nơm jao nău kan ta ăp ntŭk gŭ kan khlay.

Wa Hồ Văn Mười, Kruanh UBND n’gor Lâm Đồng, an gĭt, rnôk dơi tâm pă di ntŭk kan, cán bộ ntik n’hao uĕh nău blău kan, nuih n’hâm dơn kan dơi n’hao prêh, nău kan nkra ngăch, geh nău tam lơn, hŭch bah ir ntĕ der, tâm nje nău kan bah nê rdâk nâp tay nău nsing nơm bah ƀon lan đah n’gâng kan ăp gưl. Ngăn an saơ nău tâm pă cán bộ “di ntŭk, kăr nău kan” bah n’gor Lâm Đồng mô dơn lah nău ŭch geh ta năp măt ma hôm lah trong nkra jŏ jong, mpơl nău nsrôih chính trị âk bah n’gor tâm rdâk njêng rmôt cán bộ tŏng nuih n’hâm uĕh lŏng, nău dơi n’hanh nău nsĭng nơm, tŏng an nău ŭch geh dơn kan tâm nô nău mhe, rgop ntrŭt ntrôl hun hao wăng sa- rêh jêng kon nuĭh ta ntŭk du trong nâp dăng./.