Nău ƀư “Khay njuăl prăk mpêt nkrem an nuĭh ach o” ta n’gor Lâm Đồng hŏ rgop jêng tơm prăk tŏng nar lơn ma âk nău ŭch geh manh tơm prăk bah nuĭh ach o. Lôch 1 pơh rgŏ jă  njuăl prăk mpêt nkrem an nuĭh ach o, Ngân hàng chính sách xã hội n’gor Lâm Đồng dơn geh 67 rmen prăk. Bôk nău kan dôl rêng lam hvi ta Lâm Đồng, wăch rgum nar lơn ma âk nuĭh râng. 

Tâm bah ri aơ nơh, rnôk ăp tơ̆ rgŏ jă njuăl prăk mpêt nkrem an nuĭh ach o ri wa Nguyễn Thị Xuân An, phường 3, nkual ƀon têh Đà Lạt, n’gor  Lâm Đồng ŭch râng da dê đŏng. Đah păng, bol rnoh prăk he njuăl mô âk yơn dŭt geh nkô̆ khlay, nsum ti  ndrel kônh wa, lam ƀon lan kơl  nuĭh  ach o,  nuĭh jêr jŏt, kơl khân păng geh tơm prăk manh gay ntuh kơl hun hao wăng sa rnăk wâl. Wa Nguyễn Thị Xuân An, lah:

“Săk gâp  nơm ăp năm râng da dê. Ntĭt kơt năm bah năp  nơh njuăl đêt ri  năm aơ nsrôih njuăl âk lơn, ăp năm kơt nê mbro.  Năm aơ gâp njuăl mpêt nkrem geh 20 rkeh prăk, nchrăp nar 14/3 ta phường njuăl tay”.

Aơ lah năm tâl 4 Ngân hàng Chính sách Xã hội n’gor Lâm Đồng kan nsum đah Ủy ban Mặt trận Tổ quốc Việt Nam n’hanh ăp nsum mpôl bah n’gor ƀư rgŏ  jă  njuăl prăk mpêt nkrem an nuĭh ach o. Tĭng nê,  rnoh  nuĭh ŭch râng njuăl prăk mpêt nkrem an nuĭh ach o nar lơn ma âk, rnoh prăk dơn geh nar lơn ma âk. Ntơm bah 24 rmen prăk dơn geh lôch rơh rgŏ jă bôk năp,  tât tâl 3 rnoh prăk hao rlău  130 rmen prăk njuăl prăk mpêt nkrem an nuĭh ach o.

Tĭng wa Nguyễn Hữu Quang, Groi giám đốc Ngân hàng chính sách xã hội n’gor Lâm Đồng, bôk nău kan njuăl prăk mpêt nkrem an nuĭh ach o  hŏ rêng lam têh hvi  tâm ăp rơh kơn ƀon lan  ta n’gor. Tâl 4  dja, bôk nău kan njuăl prăk mpêt nkrem an nuĭh ach o mbra ntoch jong du khay, mpŏng wăch rgum  tay âk nuĭh râng, kơt tĭng.

“Năm aơ, njuăl prăk mpêt nkrem an nuĭh ach o ntoch jong tât du khay. Mpôl  hên mpŏng ƀư an mông nar jong lơn mbra gay an nuĭh ƀon lan râng ăp tŏng, âk lơn. Mpôl hên rlău ma ƀư ta nhih pah kan dĭl, ri  ăp nar rhŏ dŏng bah ăp ntŭk rhŏ dŏng kan du ntŭk ta ăp xã, phường, thị trấn mbra ƀư hăn rgŏ jă gay nuĭh ƀon lan, doanh nghiệp ta ntŭk ndrel râng rgop tâm bôk nău kan đŏng”.

Tât rnôk dja, lôch rlău 1 pơh rgŏ jă, bôk nău kan njuăl prăk mpêt nkrem an nuĭh ach o ta Lâm Đông hŏ wăch rgum rlău 1.400 đảng viên, cán bộ, công chức, viên chức, hội viên, đoàn viên, nuĭh kan n’hanh  ƀon lan râng pơk bơi 1.600 siƀŭt mpêt nkrem, đah rnoh prăk rlău 67 rmen prăk.

Wa Võ Ngọc Hiệp - Ủy viên Ban Thường vụ Tỉnh ủy, Groi kruanh UBND n’gor Lâm Đồng, Kruanh Ban ntơh măt  Hội đồng Quản trị Ngân hàng Chính sách xã hội n’gor Lâm Đồng, uănh năl: “Nău ƀư” “Khay njuăl prăk mpêt nkrem an nuĭh ach o” geh nkô̆ dŭt n’hâm khlay, gay njêng geh tơm prăk tŏng an nar lơn ma ŭch geh prăk manh âk lơn bah nuĭh ƀon lan nuĭh ach o n’hanh ăp  nuĭh dơi kơl êng ƀa ƀă, rgop tĭng ƀư rnoh tât ŭch n’hŭch ach o jŏ jong bah n’gor. Nkre, bah nê njêng nău rgâl mpeh nău  gĭt êng n’hanh dâk kan bah ăp gưl n’gâng kan  n’hanh lam rêh jêng kon nuĭh tâm  nău njêng geh tơm prăk an manh thuk dơh; rgŏ  jă ăp  doanh nghiệp, nhih pah kan, đơn vị, cán bộ, công chức, viên chức, nuĭh kan n’hanh ăp rơh kơn ƀon lan tâm n’gor Lâm Đồng gay mpơl nuih n’hâm uĕh lŏng,  ntik n’hao nuih n’hâm tâm yô̆ tâm kơl đah nuĭh ach o n’hanh ăp nuĭh mô geh nău lap ma trong ƀư njuăl prăk mpêt nkrem ta Ngân hàng Chính sách xã hội mpơl “Dâk kan jê̆ geh nkô̆ hôr têh khlay” njêng geh tay  tơm prăk “Nsum ti an nuĭh ach o n’hanh ăp nuĭh dơi kơl êng ƀa ƀă”.

N’hŭch ach o jŏ jong lah trong nchrăp têh bah Đảng, Ngih dak  n’hanh lah nău kan bah lam ƀon lan, nsĭt tay nuih n’hâm rŏng kơl nuĭh jru hvi,  lah nău mĭn rloh rlău, rôih sŏng bah Đảng, Ngih dak tâm rnôk rdâk njêng jêng wăng sa  ntŭk tăch  rgâl rƀŏng tât xã hội chủ nghĩa. An manh prăk thuk dơh tă bah Ngân hàng Chính sách xã hội ƀư lah ngoăy tâm ăp ndơ dŏng kơl n’hŭch ach o tă bah Đảng, Ngih dak tĭng ƀư n’hanh ta n’gor Lâm Đồng an manh tơm prăk thuk dơh hŏ ntik n’hao dơi nău tam têh kuâng, rgop tĭng ƀư bôk nău kan n’hŭch ach  o nâp dăng jŏ jong rdâk njêng ƀon lan mhe, đăp mpăn rêh jêng kon nuĭh ta n’gor.

Tĭng trong leo ƀư “Lam dak nsum ti kơl an nuĭh ach o – mô an geh du hê ndul êng bah kơi” tă bah Thủ tướng Chính phủ rgŏ jă, tâm 3 năm aơ “njuăl prăk mpêt nkrem an nuĭh ach o” hŏ dơi Ngân hàng Chính sách xã hội n’gor Lâm Đồng kan nsum đah 4  nhih pah kan chính trị lam rêh jêng kon nuĭh dơn nsing nơm ƀư geh nău dơi đah nău n’grŏ tĭng bah âk mpưm hội viên, đoàn viên n’hanh ƀon lan tâm n’gor rgop uĕh tâm nău njêng tơm  prăk  kơi ntop tay an Ngân hàng Chính sách xã hội an nuĭh ach o n’hanh ăp  nuĭh dơi kơl êng ƀa ƀă manh./.