30 năm rlau aơ, ăp nŭih nchih báo ta VOV Tây Nguyên ngăn ngên jêng ăp nŭih leo trong lor tâm nau mĭn, nau kan văn hoá: ƀư ueh nau kan báo chí cách mạng: lah nŭih nkoch mbơh nau ntrŭnh, ntrong kan bah Đảng, nau ntrŭnh ndrel pháp luật bah Ngih dak. Mbơh ăp nau ngăch, tâm di, năn. Nkre mbơh, dun lơi geh nau bonh ngăn ăp nau tih, mbơh kloh ăp nau ƀư mhĭk rlăm tâm nau kan roh đăp mpăn, rgop nau khlay tâm nau hun hao bah Tây Nguyên. Wa Điểu Dũng, tâm xã Dak Ndrung, nkuăl Dak Nsong, ngơi:

‘Bôk nau ngơi rnoi Bunong ueh ngăn, kônh wa ŭch ngăn djăt. Bôk nau ntoh ngơi nar lơn ma âk ntil, bôk nau ntuh nkoch nau kan tuch tăm mbơh ân kônh wa nau mât chăm tơm tăm. Nkoch mbơh mpeh nau ntrŭnh bah ndrel Ngih dak tât kônh wa. Gâp ŭch bôk nau ntoh ngơi Bnong mât ueh ăp nau ntoh mpeh nau bonh đă kon sau hăn nti, tăm mât chăm tiêu, cà phê, kônh wa ŭch ngăn djăt”.

Wa Ka Lót, rnoi K’ho Mạ, tâm xã Lộc Bắc, nkuăl Bảo Lâm, n’gor Lâm Đồng lah nŭih ŭch ndăn djăt Radio Việt Nam ntoh nau ngơi rnoi K’ho. Djăt ăp mprơ đah nau rnoi nơm, wa Ka Lót rhơn ngăn. Lah cán bộ ƀư nau kan tâm dâng, wa saơ nau khlay bah nau ngơi rnoi deh nơm mô knŭng dŏng gay ma tâm mbơh ngơi ăp nar, ma tâm nau kan ăp nar đŏng. Rnơm geh djăt ăp nau ntoh bah rnoi K’ho bah Radio Việt Nam ma wa Ka Lót geh tay nau blau mpeh nau vay ơm bah rnoi nơm:

‘Săk gâp ŭch djăt nau mprơ Long, mprơ nau mprơ noi nơm, yơn săk gâp nơm ngơi ri mô lăng kloh ndrel mô blau mprơ nau nơm...ri gâp ŭch ngăn djăt Radio. Đảng, Ngih dak hŏ kơl an leo nau ngơi rnoi K’ho Mạ ntoh klơ Radio ri gâp rhơn ngăn”.

Wa Ha Hiếu, rnoi K’ho pah kan tâm ntŭk kan Văn hoá thông tin ndrel thể thao nkuăl Đam Rông, n’gor Lâm Đồng mbơh, păng nkre lah phóng viên, biên tập viên, rblang nau ngơi ndrel ntoh nau ngơi rnoi K’ho. Êng nau kan ƀư nau ngơi ta ntŭk, Ntŭk ntoh rup bah nkuăl hôm ndơn ntoh nau ngơi bah Ntŭk kan ntoh rup ntoh ngơi n’gor Lâm Đồng ndrel nau ngơi rnoi K’ho bah Radio Việt Nam gŭ kan tâm Tây Nguyên ƀư. Rnơm ri, kônh wa rnoi K’ho tâm nkuăl jru Đam Rông ndơn nau mbơh âk ntil ndrel rjăp ngăn:

‘Bah năp nơh gâp pah kan tâm jrâu kan Nội vụ, jêh nê pah kan tâm Jrâu kan rnoi mpôl đê̆. Tât năm 2018 gâp pah kan bah ntŭk kan Ntoh rup ntoh ngơi nkuăl Đam Rông. Nau kan ăp nar bah gâp lah rblang ntơm nau Yuăn jêng nau K’ho. Jêh nê ru ƀư ntoh ngơi rnoi K’ho đŏng. Ăp nau ma hên ƀư ta aơ ri geh tât nau nkra, nau kan hun hao văng sa tuch tăm rnăk vâl, nau kan mât ntŭk ntu gŭ âm tâm ƀon lan, nau kan ntĭm nti bah oh kon se tâm nkuăl”.

30 năm rlau aơ, Ntŭk kan Radio Việt Nam kan tâm nkuăl Tây Nguyên hŏ rlet rlau nau dơi bah nơm gay ƀư jêh nau kan. Bah nau nkoch mbơh, ntrêng ăp, năn tŏng jru hvi, tâm di nau ntrŭnh bah ăp nau kan chính trị, văng sa rêh jêng, rnă njrăng neh dak geh tâm lam nkuăl tât đah kônh wa djăt, răk nau ndrle nŭih djăt tâm dak ndrel dak ba dih. Ntŭk kan Radio Việt Nam tâm Tây Nguyên hŏ rgop nau ueh ngăn ân nau kan n’hao nau săk tam bah nau ndâk njêng rmôt tâm rnglăp lam rnoi mpôl, ân nau hun hao bah nkuăl Tây Nguyên”./.