Tĭng Kruanh N’gâng kan Prăk kaih Nguyễn Văn Thắng, gay ƀư rgop ăp nău rƀŏng ma Nghị quyết n’gluh an tâm trong nchrŏng hun hao neh dak lvang 2026-2030, “rgum lôch jêh lĕ rngôch, tâm ban trong ƀư nsum” dơi mĭn lah nău kan khlay. Đah nău kan Prăk kaih, lôch jêh trong ƀư nsum wăng sa nău đă gay nău kan rgâl mhe tay nău mĭn, nău ƀư. Wa Nguyễn Văn Thắng nkoch kloh:

Trong ƀư nsum rgop tŏng ăp ngăch n’hanh mbơh ƀư săk rnglăy ăp nghị quyết bah Đảng mpeh hun hao ăp gưl wăng sa, ƀư tĭng rgop mpŏng ŭch hun hao jêng nău ƀư n’hanh săk rnglăy na nê̆. Ntrôl dăng dăp tay mât uănh n’hanh prăk ta ăp doanh nghiệp Ngih dak, n’hao săk rnglăy nău ƀư lơn lah ntuh kơl nău nchrăp ƀư gay đăp mpăn geh nău ntrong leo nkre đăp mpăn săk rnglăy prăk kaih. Mĭn lah n’hanh mât uĕh ƀư tơm bah wăng sa Ngih dak. Hun hao wăng sa ƀư êng ngăn ngên jêng du nuih n’hâm khlay ngăn bah jâng wăng sa. Ntop kơl hun hao pơk hvi ntŭk tăch rgâl an wăng sa nsum, hợp tác xã.

Đại hội 14 mĭn lah nsrôih dŭt n’hâm chính trị têh bah Đảng tâm nău n’gluh an văn hóa n’hanh kon nuĭh gŭ ta nklang bah trong hun hao neh dak. Aơ mô knŭng lah nău ndơn tay nău mĭn bah Đảng tă bah ăp rơh cách mạng n’hanh rgâl mhe, ma hôm lah njoat hun hao mhe tâm nău mĭn trong hăn têh. Wa Nguyễn Văn Hùng, Kruanh N’gâng kan Văn hóa thể thao n’hanh Pâl nđaih mbơh an 6 rmôt trong mkra gay “Mât uĕh soan dăng tâm trôm bah văn hóa, kon nuĭh Việt Nam-jâng trong hun hao ngăch n’hanh nâp nâl neh dak tâm rach năm mhe”.

Rgâl mhe têh dăng lĕ rngôch nău mĭn wât rbăng mpeh hun hao văn hóa, mĭn ntuh kơl an văn hóa lah ntuh kơl hun hao nâp nâl bah neh dak an nău rêh rgŏ năp bah rnoi nuĭh. An n’hao nău blău bah rmôt ƀư văn hóa, nkô̆ nău kon  nuĭh na nê̆ ƀư jêng n’hanh ntrong leo nău khlay văn hóa bah rơh mhe. Uănh hun hao công nghiệp văn hóa n’hanh wăng sa mĭn ƀư mhe lah nuih n’hâm hao jêng mhe, rgop na nê̆ an hao jêng GDP.

Tĭng wa Y Thanh Hà Niê Kđăm, Bí thư n’gor ủy Lâm Đồng, nău knơm bah nuĭh ƀon lan đah Đảng lah n’gâng tơm nâp nâl gay ƀư dơi ăp nău rƀŏng têh ma Đảng n’gluh an. Tâm rnôk neh dak dôl lăp lvang hun hao mhe đah âk nău dơi geh n’hanh ntŭl rlong tâm srah, gay nâp nâl trong chính trị nkual ƀon lan rnoi mpôl đêt, wa Y Thanh Hà dăn đă:

N’hao ndâk njêng n’hanh mât uĕh ƀư tơm rmôt kan leo lor chính trị, ngăn lah nuĭh geh nsing nơm tâm rnoi mpôl đêt, chroh rƀŭn; gĭt na nê̆ nu nău nuĭh ƀon lan. Rgŏ jă nking n’gang, njrăng n’gang ăp rmôt ƀư rlăng, nuĭh dun phah lăp, kuăl jă ƀon lan râng dun phah Đảng, Ngih dak he. Ƀư uĕh trong kan tâm rnglăp nuĭh ƀon lan, ngăn lah mât uĕh nău way ơm tâm rnglăp đah ăp ntŭk n’har brri đah dak băl. Rgŏ jă ƀon lan mât ndrăy n’hanh mât nău uĕh văn hóa rnoi mpôl đêt, nkre mât ndrăy nău way ơm, nâp nâl nău uĕh nkre n’hao tâm rnglăp, ntô̆ n’hao rnoi nuĭh, aơ lah nkô̆ nău tơm gay dun tay ăp nău ƀư mô uĕh tă bah dih kơt chroh rƀŭn nŏng êng, nuĭh tih rlŏ rlău neh dak.

Tâm ŭch ngăn đah nău mĭn ntĭm rđău: “Nuĭh ƀon lan ta n’gul, lah nuĭh ƀư tơm, lah nău rƀŏng n’hanh nuih n’hâm bah nău hun hao” dơi nkoch tâm văn kiện Đại hội, wa Nguyễn Thị Thúy Lam, Bí thư Đảng ủy xă Tân Khánh Trung, n’gor Đồng Tháp an lah, du neh dak têh janh mô knŭng dơi wĕ đah têh wăng sa mô lah ngăch hao jêng GDP, ma khlay lơn đah uĕh nâp nău rêh n’hanh rnoh uĕh lăng bah nuĭh ƀon lan. Nău têh ndrŏng knŭng ngăn ngên geh nkô̆ nău khlay ăp nuĭh ƀon lan dơi rêh hơm răm, dah rŏng, đăp mpăn n’hanh uĕh lăng. Wa Nguyễn Thị Thúy Lam nkoch nău rgop:

 Nĕ lah ntŭk rêh nuĭh ƀon lan dơi đăp mpăn, gĭt blău. Nuĭh ƀon lan mô knŭng tŏng sa, tŏng nsoh ma hôm dơi geh ăp nău rhŏ dak si, ntĭm nti, văn hóa uĕh ngăn; dơi rêh tâm ntŭk nti bri dak kloh uĕh. Nĕ lah, ntŭk geh nău dơi êp ƀon lan, rhŏ nuĭh ƀon lan; du n’gâng kan djôt bôk gĭt “rwê nău rwê bah nuĭh ƀon lan, nău răm bah ƀon lan”. Nĕ lah, ntŭk geh du nsum mpôl tâm rnglăp, ntŭk tâm mât tâm rgum ƀon lan dơi rhăt jăp, ăp nău khlay văn hóa way ơm dơi ntô̆ n’hao n’hanh mât ndrăy.

Bah lôch jêh Đại hội 14 bah Đảng, du cán bộ đảng viên ndrel Nuĭh ƀon lan nsrôih rgâl nău ntrŭnh, nghị quyết bah Đảng jêng ăp nău ƀư na nê̆, sŏk săk rnglăy ngăn ngên n’hanh uĕh lăng bah Nuĭh ƀon lan nău wĕ têh ngăn. Bah lôch jêh trong ƀư nsum wăng sa, hun hao tâm ban ăp gưl wăng sa, tât mât uĕh soan dăng văn hóa, kon nuĭh n’hanh nâp nâl trong chính trị ta ntŭk, lĕ rngôch rƀŏng tât nău ŭch ndâk njêng du neh dak hun hao ngăch da dê, nâp nâl, geh âk nău uĕh n’hanh têh nău nsing nơm. Aơ lah n’gâng tơm khlay gay ƀư rgop mpŏng ŭch mpeh du Việt Nam têh dăng, ndrŏng kuăng tâm rach năm hun hao mhe.