Lữ đoàn Đặc công kơh 198 gŭ kan ta xã Hoà Đông, nkuâl Krông Pắc, n’gor Dak Lak. Ăp năm aơ, ndrel đah nău ƀư lôch jêh ngăch prăl nău dơn kan chính trị - tahen, Lữ đoàn hôm tĭng ƀư geh nău tam pah kan rgŏ jă đŏng.

Ntơm bah năm 2021 tât aƀaơ, đơn vị hŏ mon 13 mblâm jay ndrăng băl tahen, 14 mblâm jay tâm rŏng, 9 mblâm jay tâm rnglăp n’hanh bar nhih nti an n’gâng kan n’hanh ƀon lan ta ntŭk tahen gŭ kan, đah lĕ rngôch prăk dŏng ƀư 5 rmen 610 rkeh prăk. Rlău ma đơn vị hŏ ntop kơl rlău 10 tấn phe khay ji ngot an kônh wa; bar pe jât rbăn nar luh kan nkra tay ntung trong, n’hong dak lŏ, klêh donh ndơ tuch tăm; ƀư âk rơh but săm ji, phăt dơm dak si an rlău 7.000 tơ̆ nuĭh ƀon lan. Ăp nău kan ngăn ngăn bah Lữ đoàn Đặc công kơh 198 ta n’gor Dak Lak rgop ndrel ăp nkuâl ƀư jăp pah kan đăp mpăn rêh jêng kon nuĭh, ma hôm ntĭm nti nău way ơm cách mạng an rơh mom ndăm, hŭr tŏ nuih n’hâm rŏng dak, rdâk nâp tay nău tâm rnglăp tahen ƀon lan.