Nar 29/12, ta phường Thống Nhất, n’gor Gia Lai, Đại tướng Nguyễn Trọng Nghĩa, Ủy viên Bộ Chính trị, Chủ nhiệm Tổng cục Chính trị Tahen ƀon lan Việt Nam ƀư tơm Tâm nchră mâp măt bu ranh ƀon, kruanh thôn, kruanh bản, nuĭh geh nsing nơm, kruanh chroh rƀŭn ntoh lư ta Tây Nguyên. Ta tâm nchră, ăp đại biểu hŏ tâm ôp, tâm rkhăch, tâm nchră mpeh ăp nkô̆ nău dôl ndơ̆ luh tâm pah kan rgŏ jă, rdâk njêng nâp “ntŭk nsing nơm nâp dăng tâm nuih n’hâm ƀon lan” n’hanh tĭng ƀư nău dơn kan tahen, njrăng n’gang neh dak tâm nô nău mhe.

Rmôt bu ranh ƀon, kruanh thôn, kruanh bản, nuĭh geh nsing nơm, kruanh chroh rƀŭn ntoh lư lah “găr ntil buăt nthoi” tâm ƀon lan n’hanh lah ntung njŏ nâp jong đah Đảng, n’gâng kan ta ntŭk, mpôl tahen đah ƀon lan. Đại tướng Nguyễn Trọng Nghĩa nkah gĭt n’hanh mpư rnê ăp nău rgop khlay mha êng bah ăp bu ranh ƀon, nuĭh geh nsing nơm, kruanh thôn, kruanh chroh rƀŭn tâm bah ri aơ. Đại tướng lah rjăp nău mĭn mô rgâl bah Đảng, Ngih dak n’hanh Mpôl tahen: ƀon lan way gŭ khlay ta n’gul, lah nuĭh tơm bah ăp gung trong, nchrăp kơl n’hanh lah tơm suan dăng n’glêh an tât n’gâng kan rgâl mhe, hun hao neh dak. Đại tướng ŭch rŏng tâm let năp tay, ăp bu ranh ƀon, kruanh thôn, nuĭh geh nsing nơm, kruanh chroh rƀŭn ntik n’hao tay nău khlay kan, ndrel hăn đah Mpôl tahen, n’gâng kan ta ntŭk nsum ti mât chăm nău rêh, ntĭm nti kon se, mât nâp đăp mpăn ƀon lan, njêng jâng nsing nâp an nău hun hao jŏ jong bah Tây Nguyên.