Bar hê kruanh n’gâng kan lĕ dơn ngoăy uănh năl, tâm ba năp nơh, tĭng di nău mpŏng kan ma nuĭh leo kan gưl têh đah 2 dak lĕ dơn ngoăy. Bar ding lĕ geh mât săk rnglăy nău kan tâm mbơh kan, mbơh ôp nău kan đah nuĭh leo kan gưl têh, n’hao nău tâm kơl kan đah ăp mpôl kan mât uănh, mât đăp mpăn n’har bri, tahen dak lêng, cảnh sát dak lêng, tâm rgop uănh nđôi nsum, njrăng rdâng nuĭh tih rgŏ n’har bri ngih dak, tăch rlăm ndơ. Âk nău kan tâm kơl kan na nê̆ geh mbơh ƀư kơt lah: tâm rnglăp ta pôih tahen- ntŭk kan, tâm rnglăp ntŭk gŭ ƀon lan bar ding trong n’har bri, ăp bôk nău kan rnă njrăng nău rêh jêng kơl an ƀon n’har bri. Bar hê kruanh n’gâng kan dơn ngoăy an geh ndâk nsơm nău tâm rnglăp, tâm kơl, n’hao tâm mâp tâm nđur kan, n’hao an săk rnglăy ăp nău tâm kơl kan 2 ding aƀaơ geh, pơk hvi nău tâm nđur sĩ quan mom, nuĭh leo kan mom, njêng nău mhe ta trong ntĭm nti nuĭh kan, tâm rgop na nê̆, tâm kơl ndrel ta ăp ntrong kan, rơh tâm mâp rnă njrăng ngih dak ta nkual n’hanh lam ntur neh. Bar ding lĕ geh dơn ngoăy ntrôl an tâm kơl pe dak Việt Nam- Laò- Campuchia, tâm nĕ geh ăp rơh tâm mâp ăp năm đah pe kruanh n’gâng kan mât rnă njrăng ngih dak n’hanh rơh nti tahen nsum mpeh tâm rdâng đah ăp nău ntul rlong nsum mpeh rnă njrăng mô way ơm, kơt tâm kơl nuĭh rmanh, njrăng nău tât bâh mih sial, nuh srê.