Mhe rlău, wa Trương Thị Mai, Ủy viên Bộ Chính trị, Rnâng kan Ban Bí thư, Kruanh Ban Tổ chức Trung ương n’hanh mpôl pah kan lĕ tât khâl, an ndơ tết an phung pah kan, nuĭh kan ta nkual công nghiệp Phú Hội, nkuăl Đức Trọng, n’gor Lâm Đồng. Ta nar tât khâl, wa Trương Thị Mai lĕ uănh lah prêh nău ƀư n’hanh nău nsrôih rlet rlău jêr jŏt bah nsum mpôl cán bộ, phung pah kan, nuĭh kan nkual công nghiệp Phú Hội tâm nău ƀư nkra njêng, nkret njêng ndơ lŏ mir. Rgop ndơ̆ rnoh hao jêng nău kan lŏ mir bah n’gor lah êng, lam dak lah nsum geh âk ngăn tâm 10 năm bah năp. Ndơ biăp, bum, play bah Lâm Đồng aƀaơ lĕ dơi tăch n’gluh an ntŭk tăch âk dak ta lam ntŭr neh. Nkre, wa Trương Thị Mai dăn dă ăp nkual công nghiệp, n’gâng kan ƀon lan n’gor Lâm Đồng uănh mĭn tay ntop kơl, mât uănh nău rêh an nuĭh pah kan ta ăp nkual công nghiệp, ngăn lah ndăn jêh ăp nău nchrăp ƀư jay gŭ kon nuĭh an phung pah kan. Di rơh aơ, wa Trương Thị Mai lĕ an ndơ tết an nkual công nghiệp Phú Hội; an 200 nklâm ndơ an phung pah kan, nuĭh kan bah nkual công nghiệp, du nklâm ndơ khlay 1,3 rkeh prăk.

         Ta nkual ƀon têh Kon Tum, Groi Thủ tướng Chính phủ Trần Hồng Hà ndrel Mpôl pah kan Trung ương lĕ tât râng Bôk nău kan “Tết sum vầy-Xuân chia sẽ” yor Liên đoàn Lao động n’hanh Ủy ban MTTQ Việt Nam n’gor Kon Tum ƀư. Ntoh ngơi ta bôk nău kan “Tết sum vầy-Xuân chia sẻ” an phung pah kan n’hanh rnăk geh nău rêh jêr jŏt bah n’gor Kon Tum, Groi Thủ tướng Chính phủ Trần Hồng Hà njuăl nău chop khâl đêp rmên bah Tổng Bí thư Nguyễn Phú Trọng; ăp đồng chí kruanh Đảng, Ngih dak n’hanh nău rŏng ngăn bah êng nuĭh tât đồng chí, ƀon lan đah naư mbah rhơn năm mhe uĕh lăng ngăn. Mbah rhơn ăp nuĭh, ăp jay geh du Tết hơm răm, uĕh lăng, du năm mhe đăp mpăn n’hanh uĕh lăng. Groi Thủ tướng rnê rhơn n’gor Kon Tum lĕ mât uănh an ăp phung pah kan n’hanh rnăk geh nău rêh jêr jŏt tâm rơh năm mhe tết tât, nkre đă n’gor uănh mĭn tay gay ăp nuĭh geh nău rêh jêr jŏt rlet rlău rklaih luh ach o nâp nâl:

 Ăp gưl ủy, n’gâng kan ƀon lan n’gor Kon Tum uănh mĭn tay, geh ăp nău kơl rnăk ach o, rnăk wâl ach o n’hanh đăp mpăn lah rklaih ach o nâp nâl. N’hao nău wât nău blău nkra njêng, nta tay nău kan, joi nău rêh an nuĭh ach o, êp ach o hao tâm nău rêh. Uănh tât neh nkrem hun hao hao neh jay gŭ kon nuĭh, thể dục thể thao, ăp trong nkra an phung pah kan ta ăp nkual công nghiệp. Nâp nâl ƀư, n’hao săk rnglăy nău kan bah Liên đoàn Lao động.

Nău mbơh mpeh nu nău wăng sa-rêh jêng neh dak, Groi Thủ tướng Chính phủ Trần Hồng Hà mĭn lah neh dak lĕ rlet rlău năm 2023 âk jêr jŏt đah rnoh hao jêng wăng sa rlău 5,05%, mpeh tâm rmôt hao jêng âk tâm nkual n’hanh lam ntŭr neh. Mât uĕh nău way ơm tâm yô̆, tâm kơl bah rnoi nuĭh n’hanh nău uĕh ơm bah trong ƀư he, Đảng n’hanh Ngih dak uănh mĭn mro tât nău rêh Nuĭh ƀon lan, tât trong kan jŭt n’hŭch ach o, uănh aơ lah nău đă jăch ndăn, lah nău kan khlay, trong ƀư têh bah rnôk hun hao ngăch, nâp nâl neh dak. Di rơh aơ Groi Thủ tướng Chính phủ Trần Hồng Hà ndrel kruanh n’gor Kon Tum lĕ an ndơ Tết an 200 phung pah kan n’hanh 50 rnăk geh nău rêh jêr jŏt đah du nkjlâm ndơ khlay 1 rkeh 300 rbăn prăk.

Ta năp nĕ, Groi Kruanh dak Võ Thị Ánh Xuân ndrel mpôl pah lan Trung ương lĕ hăn khâl, an ndơ rnăk dơi kơl, phung pah kan geh nău rêh jêr jŏt ta nkuăl Vũ Thư, n’gor Thái Bình. Tât khâl, ntrŭt nsôr, an ndơ phung pah kan geh nău rêh jêr jŏt ta Công ty Cổ phần Quốc tế Bảo Hưng, Groi Kruanh dak Võ Thị Ánh Xuân nkoch, năm 2023 đah nău ntĭm rđău bah Đảng, nău nsrôih bah lĕ trong chính trị ndrel nău rgop bah ăp rơh kơn nuĭh ƀon lan, doanh nghiệp neh dak lĕ dơi geh ăp nău geh khlay ta lĕ rngôch ăp ntil.

Lah rjăp, Đảng, Ngih dak uănh mĭn mro, n’hao nău rêh drăp ndơ, nuih n’hâm an nuĭh ƀon lan, tâm nĕ geh phung pah kan. Groi Kruanh dak uănh lah prêh n’gor Thái Bình năm bah năp lĕ dơi geh âk săk rnglăy ntoh lư tâm hun hao wăng sa-rêh jêng; lah rjăp tâm nău geh nsum nĕ geh nău rgop dŭt n’hâm bah rmôt phung pah kan tâm ăp doanh nghiệp ta lam n’gor lah nsum n’hanh bah Công ty Cổ phần Quốc tế Bảo Hưng lah nsum. Groi Kruanh dak đă n’gor Thái Bình uănh khlay mât uănh tết an nuĭh ƀon lan, lơn lah kơp tay ăp rnăk ach o, phung pah kan geh naư rêh jêr jŏt gay nchrăp ntop kơl, mô an geh nuĭh ntlơi bah kơi.