VOV4.M’nông: Lơ 26/9, Kruanh n’gâng kan tuch tăm ndrel Hun hao ƀon lan Lê Minh Hoan, Groi Kruanh Rnâng kan Rđau kan neh dak mpeh nau njrăng rdâng trôk nar lơh ndrel rmôt hăn kan hŏ mêt uănh nau kan njrăng rdâng đah phŭt mrô 4 tâm n’gor Quảng ngãi ndrel mêt uănh nau nâp bah nglau n’gâr dah Phú Ninh, n’gor Quảng Nam. Kruanh n’gâng kan Lê Minh Hoan hŏ hăn uănh mpir njrăng nau rluh neh Cửa Đại, nkual ƀon têh Hội An, n’gor Quảng Nam ndrel djăt nau mbơh nau kan geh njrăng rdâng đah phŭt dak lip bah n’gor Quảng Nam.

Kruanh n’gâng kan  Lê Minh Hoan ta dak bât Phú Ninh- Quảng Nam

Kruanh N’gâng kan Lê Minh Hoan rnê prêh nau rđau kan njrăng rdâng đah phŭt dak lip bah n’gor Quảng Nam, Quảng Ngãi. Tĭng Kruanh n’gâng kan, ăp n’gor aơ kŏ geh bar nkuăl gay ma rdâng đah phŭt dak lip, nê lah măt dak lêng ân geh kơp uănh lĕ ăp duk mpan, ntrơn leo ƀon lan tât ntŭk đăp mpăn, hôm nkuăl yôk ân geh njrăng nau tât bah dak me dak jăng hao prêh, rluh yôk.

 Ndrel đah ăp n’gor miền Trung, ăp n’gor ta Tây Nguyên lĕ geh mbơh ăp trong kan tâm rdâng đah phŭt mbrô 4. Kêng măng nar 26/9, rnâng kan n’gor Ủy Kon Tum leo ƀư ngăch ndal rƀŭn nchră trực tuyến đah ăp gâl ủy, n’gâng kan bâh n’gor tât xã gay ma dơn ngoăy nău mĭn leo kan, ntĭm đă nău kan njrăng, rdâng đah phŭt sial. Tĭng nĕ, rnâng kan n’gor ủy lĕ geh dơn ngoăy đah nău dăn đă bâh ntŭk kan ntĭm nti kơl an kon hoc rlu nti bâh nar 27/9 tât rnôk geh nău mbơh mhe.

N'gor Kon Tum rƀŭn nchră ndal, nchră trong tâm rdâng đah phŭt mbrô 4

UBND n’gor Kon Tum lĕ geh njêng 3 mpôl kan ƀư tĭng uănh nđôi, ntĭm đă, njrăng rdâng ta ăp nkuăl mbra geh nău khuch tât hô geh: Kon Plông, Kon Rẫy, Ngọc Hồi, Đăk Tô, Đăk Hà, Tu Mơ Rông n’hanh Đăk Glei. Rnâng kan n’gor Ủy Kon Tum đă ăp gâl ủy, n’gâng kan bâh n’gor tât ntŭk kan ba dâng an geh nsrôih ntrơn ƀon lan luh nkual mbra geh nău tât hô mpeh rluh neh, dak rchoh, mô an nuĭh ƀon lan hăn nsong ta ăp nkual mbra geh mih dak buk hô tâm rnôk geh mih sial.

VOV.VN

                                                  Nuĭh rblang: Thị Đoắt