VOV4.M’nông- Ôi nar 15/9, ta Hà Nội, geh ƀư rơh tâm nchră khoa học đah bôk nău “mom ndăm Việt Nam-Lào nti n’hanh pah kan tĭng nău mĭn bâh kruanh Hồ Chí Minh n’hanh kruanh Cay Sỏn Phôm Vi Hẳn” yor trung ương Đoàn TNCS Hồ Chí Minh tâm rgop đah rnâng kan Tuyên giáo trung ương ƀư. Aơ lah nău kan na nê̆ gay ma kahgĭt 60 năm nar njêng tâm boh kan đah dak bah dih Việt Nam- Lào n’hanh 45 năm nar ký tâm ton tâm rnglăp n’hanh tâm kơl đah bar dak Việt Nam- Lào.

Ăp nău tâm rgop ntoh ngơi ta rơh tâm nchră lĕ lah na nê̆ nău mĭn bâh Kruanh Hồ Chí Minh n’hanh kruanh Cay Sỏn Phôm Vi Hẳn lah drăp ndơ dŭt khlăy bâh bar Đảng, bar ngih dak lah nău mĭn kan khlăy, trong ntĭm leo kan an nău pah kan bâh Đảng n’hanh cách mạng bar dak, tâm nĕ geh mom ndăm Việt Nam-Lào. Dơn kan chính trị bâh rơh mom ndăm bar dak Việt Nam n’hanh Lào lah nsrôih nti tay, gĭt vât na nê̆ n’hanh ƀư tĭng nău mĭn bâh Kruanh Hồ Chí Minh n’hanh nău mĭn bâh Kruanh Cay Sỏn Phôm Vi Hẳn. Ăp đại biểu lĕ lah na nê̆: Rơh mom ndăm bar dak Việt Nam-Lào lah rơh ndơn tay nău kan cách mạng, hun hao n’hanh bun dăp tay nău tâm rnglăp n’hanh tâm boh ueh đah bar dak Việt Nam- Lào.

Nuĭh rblang: Thị Đoắt