VOV4.M'nông: Tâm bar nar 20 n'hanh 21/9, Mpôl đại biểu Quốc hội n'gor Dak Nông hŏ hăn mâp ăp nuĭh ƀon lan ta ăp xã Nâm N’Jang (nkuâl Dak Song), xã Quảng Tâm (nkuâl Tuy Đức), xã Quảng Phú (nkuâl Krông Nô) n'hanh xã Quảng Sơn (nkuâl Dak Glong) bah năp Rơh hop tâl 4, Quốc hội khóa XV.

Ta ăp rơh mâp, ăp đại biểu Quốc hội ta Dak Nông hŏ mbơh gĭt mpeh bôk nău kan Rơh hop tâl 4, Quốc hội khóa XV nchrăp dơi ƀư tâm khay 10 tât, mbra mĭn ŭanh âk nkô̆, trong nchrăp kan luật, tâm nê geh ăp Luật geh ngăn ngăn tât nău rêh bah nuĭh ƀon lan. Nê lah ăp trong nchrăp Luật geh nău tâm ban tâm dâng, Luật neh ntu rgâl nkra, Luật mât njrăng nuĭh dŏng ndơ, Luật hợp tác xã.

Ƀon lan Dak Nông hŏ dăn đă mpeh âk  nkô̆ nău ntoh luh  ân dơi nkra  lor ta n'gor, lơn lah ăp nău kŏ kol tâm trong kan neh ntu, mât njrăng bri, mbrơi trok tâm neh đă ntrơn du, ƀư si ƀŭt si tra tâm dâng. Lơn lah tâm trong kan tuch tăm mât rong, ƀon lan dăn đă rƀŏng trong kơl an ƀon lan bah nău "ndơ tuch tăm jŭr geh rnoh khlay hŭch thuk", "nău sreh tăm- tăm- sreh".

Nuĭh rblang: Điểu Thân