Kêng măng ( 7/1), Mpôl hăn ôp uănh, groi nđôi bah Hội đồng Bầu cử gưl neh dak hŏ pah kan ta n’gor Dak Lak gay ra uănh tay, gĭt năl nô nău an ƀư pah kan bầu cử n’hanh ăp trong mât rnă njrăng, đăp mpăn, rĭng uĕh lam rêh jêh kon nuĭh ta n’gor. Tĭng nău mbơh, n’gor Dak Lak hŏ ƀư wat jêh pah kan tâm ban ŭch lor bôk năp, mbơh 28 nuĭh dâk tâm rlong đại biểu Quốc hội khóa XVI ta n’gor gay sơch 15 nuĭh ntơh măt; mbơh 148 nuĭh dâk tâm rlong đại biểu HĐND n’gor gay sơch 84 nuĭh ntơh măt, mbơh rlău 4.300 nuĭh gay sơch 2.445 đại biểu HĐND gưl xã.

Lôch tâm nchră tâm ban ŭch, n’gor tĭng ƀư tay nău rgâl di tay dăp rgum, nuĭh râng n’hanh rnoh âk nuĭh dơi mbơh săk dâk tâm rlong tĭng di quy định, đăp mpăn ntơh măt, geh nău tâm ban n’hanh nău dơi sơch pơk lam hvi bah cử tri. Gay đăp mpăn rnă njrăng chính trị, rĭng uĕh lam rêh jêng kon nuĭh, ăp mpôl kan hŏ rdâk njêng trong nchrăp n’hanh trong nkra na nê̆, kan nsum lhăt; nău dơn hồ sơ dâk tâm rlong n’hanh ăp nău kan geh tât, ƀư đăp mpăn, di quy định. Mpôl groi nđôi kơp dơn, rnê âk nău nchrăp, nău dơn kan bah Ủy ban Bầu cử n’gor Dak Lak; dăn đă n’gor n’hao dăng pah kan mât njrăng chính trị êng nơm, wat jêh ăp trong nkra đăp mpăn rnă njrăng ta ăp ntŭk nklăch phiếu; ntrôl dăng nkoch trêng gay cử tri rƀah gĭt kloh nău lư mpeh ăp nuĭh dâk tâm rlong, tĭng ƀư nău dơi sơch di rnôk nklăch phiếu.