Kêng măng nđaơ (15/3), Mpôl pah kan bah Chính phủ yor Kruanh N’gâng kan tâm rnglăp nchră nău Bùi Thanh Sơn ƀư Kruanh rmôt pah kan lĕ geh nar pah kan đah kruanh n’gor Kon Tum mpeh nu nău hun hao wăng sa-rêh jêng bah n’gor.

Ntoh ngơi ta nar pah kan Kruanh N’gâng kan tâm rnglăp nchră nău Bùi Thanh Sơn, djôt dơn, rnê rhơn săk rnglăy n’gor Kon Tum dơi geh tâm hun hao wăng sa-rêh jêng, nkre lah rjăp: Đah ntŭk ntô, ndrel đah nău kan n’hao nâp nâl mât njrăng bri dak rnă njrăng nău hun hao wăng sa-rêh jêng bah n’gor Kon Tum geh rêng hvi dŭt têh tât nkual Tây Nguyên kơt tâm 3 dak hun hao Việt Nam-Lào-Campuchia.

Tâm rnôk hôm e âk jêr jŏt, ntŭl rlong, Chính phủ an nsrôih dŭt âk năm 2024 an ƀư tĭng ăp nău kan uĕh lơn năm 2023 gay geh jâng nsan tât lôch jêh ăp nău rƀŏng ma Đại hội Đảng rơh tal 13 n’gluh. Gay wăng sa-rêh jêng n’gor Kon Tum hun hao an năl kloh jêr jŏt, geh trong mkra dôh rklaih ngăch, nkre mât uĕh ndơ dơi geh, nău dơh geh êng.