Ta rơh tâm nchră, Thủ tướng Anthony Albanese rnê Thủ tướng Chính phủ Phạm Minh Chính rơh bôk năp tât khâl Australia; rnê âk nău tâm rgop nsrôiih bâh mpôl Việt Nam ta nău dơi nsum bâh rơh rƀŭn nchră gâl têh dŭt khlăy kahgĭt 50 năm nău tâm boh kan ASAEN- Australia ƀư ta Melbourne nar 5-6/3 mhe nơh.

Bar hê nuĭh leo kan tâm mbơh, dơn ngoăy ndrel tâm rgop na nê̆ gay ma ƀư tĭng 6 nău mpŏng kan têh gay ma ndơ̆ nău tâm kơl ta ăp trong kan hăn lăp jru, na nê̆, săk rnglăy lơn. Lôch rơh tâm nchră, 2 hê Thủ tướng lĕ mbơh nău nsum mpeh n’hao nău tâm boh kan jêng kan ndrel tơm khlăy lĕ rngôch đah Việt Nam n’hanh Australia n’hanh geh saơ nău kan pă 11 văn kiện tâm kơl ta trong kan ntĭm nti, mât rbăy nău đăp mpăn, rgâl mhe nău kan; mât nuĭh dŏng ndơ, mbơh nău tăch rgâl, ntuh kơl, khoa học-công nghệ, rgâl mhe nău kan, tơm prăk, ngân hàng, mĭn uănh khoa học gay ma hun hao tuch tăm, mât bri, tui ka, nuĭh pah kan, ntŭk gŭ rêh n’hanh ŭnh nar, ndơ trôm neh.