Nău nchih bôk năp: Trong cao tốc mbluh nkual n’hanh mpŏng hun hao ngăch an Tây Nguyên pơk uănh tĭng trong link bah dâng aơ:

https://cms-vov4.vov.vn/mnong/nau-mhe-ntuk-reh-jeng-thoi-su-xa-hoi/ak-nau-nchih-cao-toc-ap-nkual-nhanh-mpong-cao-toc-an-tay-nguyen-nau-nchih-ngoay-tay-nguyen-ntuk-kol-trong-ntuk-kol-tach-rgal-454220.vov4

Kơt hŏ nkoch bah năp nơh, Tây Nguyên săk geh, âk săk geh yơn nha hôm mbrơi hun hao đŏng yor kô̆ yơn mpeh ntung trong.  Nthoi tay du rut nău nchih “trong Cao tốc mbluh nkual n’hanh mpŏng hun hao ngăch an Tây Nguyên”, tâm nău nchih nar aơ, mpôl hên nkoch  tât nău khlay, ăp nău wơl geh n’hanh rnoh khlay bah ăp njăr trong cao tốc mbra nsĭt tay an ăp n’gor tâm nkual ma nău nchih “Tây Nguyên nđơr geh trong cao tốc”

“Trong Cao tốc Gia Nghĩa - Chơn Thành lah bôk ntơm dŭt khlay mha êng gay hun hao nkual Tây Nguyên. Ndơ tăch rdeng ngăch bah Tây Nguyên jŭr nkual ƀon têh Hồ Chí Minh, hăn tât miền Đông Nam Bộ tâm ban kơt plơ̆ sĭt miền Trung.”

“Mpôl hên ŭch rŏng geh trong cao tốc gay jêng ăp rkŭm công nghiệp, ndơ geh ƀư tuch tăm  mât rong dơi nkret njêng ta n’gor Gia Lai n’hanh lôch nê leo ƀư tăch tât ăp ntuk geh nău dơi tâm rlong âk.”

“Rnôk ăp trong cao tốc ƀư jêng n’hanh rhuăt glêh đah nkual Tây Nguyên đah bri dâng, nău hŭch đêt roh huach prăk nchuăn rdeng, roh huach prăk logistics ăp ndơ tăch n’gluh mbra n’hao dăng suan tâm rlong.”

“Geh trong cao tốc hăn sŏng ri nău nchuăn rdeng ngăch lơn; công nghiệp, tuch tăm mât rong, uănh nsum ăp ntil ndơ tăch dơh lơn. Trong cao tốc mbra nsĭt tay nău geh an nuĭh ƀon lan.”

Nê lah ăp nău mpŏng wơl geh, mpŏng kâp bah nuĭh ƀon lan, doanh nghiệp, kruanh rđău kan ăp n’gor ta Tây Nguyên mpeh ăp trong cao tốc gay nkual dja nsan jâng hun hao.

N’gor Kon Tum geh dŭt dơh soih mpeh neh ntu rnôk gŭ ta nklang n’glah 3 Đông Dương, tâm nklang pe njônh hun hao Việt Nam - Lào - Campuchia, kâng nkual wăng sa rgum tơm  miền Trung; lah ntŭk buăt nthoi, nđơn rdeng trong me Đông - Tây, yôk- dak lêng. N’gor dja săk geh âk mpeh pâl nđaih têh, ntĭt êng bah nkual Tây Nguyên, ntoh lư lah nkual Pâl nđaih neh dak Măng Đen. Wa Lê Ngọc Tuấn, Kruanh UBND n’gor Kon Tum an gĭt, n’gor dôl mpŏng kâp 3 njăr trong cao tốc hŏ n’hanh dôl dơi dăp rgum, lĕ ma cao tốc Bắc - Nam mpeh nhâp nar, cao tốc Đà Nẵng - Thạnh Mỹ - Ngọc Hồi - Bờ Y n’hanh cao tốc Quảng Ngãi - Kon Tum. An ƀư 3 njăr trong cao tốc dja mbra pơk “aih” mpông gay Kon Tum  hun hao ngăch, jŏ jong tĭng rnoh ŭch tât ta Nghị quyết 23 năm 2022 bah Bộ Chính trị.

“Nău dăp rgum, ntuh kơl ăp trong cao tốc ta n’gor lah tâm di  đah ngăn ngăn n’hanh tĭng trong rƀŏng hun hao, đăp mpăn mât dŏng săk geh, dơh uĕh bah n’gor Kon Tum. Lơn lah, trong cao tốc Quảng Ngãi - Kon Tum mbra lah ntŭk rgum tơm droh rklaih kô̆ yơn, jêr jŏt mpeh ntung trong hăn, buăt nthoi bah nkual Pâl nđaih neh dak Măng Đen; njêng jâng ntơm hun hao  ăp n’gâng kan, ăp trong kan; buăt nthoi  ăp nkual tăm tơm công nghiệp, tơm sa play, tơm dak si, sâm Ngọc Linh; tâm ntêng lêng hun hao pâl nđaih gung trong nđĭr uĕh Tây Nguyên, buăt nthoi ăp ntŭk pâl nđaih ntoh lư bah Tây Nguyên jêng du ndơ pâl nđaih uĕh êng”.

Nđơr geh trong cao tốc gay hun hao ngăch đŏng, wa Nguyễn Tuấn Anh, Groi kruanh rnâng kan UBND n’gor Gia Lai an gĭt, geh 2 trong cao tốc dăp rgum hăn rlău n’gor lah Cao tốc Pleiku - Qui Nhơn n’hanh Cao tốc Bắc - Nam mpeh nhâp nar. Nău dơi ntuh kơl, rdâk njêng ăp trong cao tốc dja mbra geh nkô̆ khlay dŭt têh đah nău mât dŏng, hun hao ăp nhih máy nkret njêng têh, ăp rkŭm, nkual công nghiệp, tuch tăm công nghệ mhe… Ntơm bah nê, kơt wa Nguyễn Tuấn Anh lah rjăp: Mbra nkra âk nkô̆ nău mpeh nuĭh kan, nta joi nău  kan, rgâl geh wăng sa an nuĭh ƀon lan ta ntŭk:

“Tâm dăp rgum bah n’gor hŏ geh ăp rkum công nghiệp, nkual tuch tăm công nghệ mhe. Ta njăr trong cao tốc lah 2 ndrâm kơh, 2 nkual mât rong ndrôk dak toh, 1.000 héc ta neh tuch tăm công nghệ mhe, hang rhiăng héc ta rkŭm công nghiệp, nkual công nghiệp. Cao tốc lăp dŏng ơm dơi 1 năm ri Gia Lai geh trong hun hao ngăch rlău tay 2-3 năm, ma ơm 5 năm ri Gia Lai dơi geh ngăch rlău 10 năm”.

Ngoăy tâm ăp njăr trong cao tốc ta nkual Tây Nguyên dôl dơi uănh ntuh kơl ntơm bah aơ tât năm 2030 lah njăr trong Dầu Giây - Liên Khương, rnoh jong rlău 200km. wa Nguyễn Văn Gia, Giám đốc Sở Giao thông Vận tải n’gor Lâm Đồng mpŏng, njăr trong cao tốc dja mbra rgop droh rklaih “kô̆ yơn” ntung trong mpeh nkual Đông Nam Bộ n’hanh ăp n’gor, nkual ƀon têh mpeh bah dâng.

“Nău ntuh kơl cao tốc Dầu Giây - Liên Khương he ân dơi lah dŭt nău  khlay. lah dơi geh trong cao tốc dja, ri rsong hăn đah nkual ƀon têh Hồ Chí Minh n’hanh Đà Lạt mbra rhuăt glêh, ring tam dŭt têh tât nău hun hao wăng sa, rêh jêng kon nuĭh ta ntŭk, tâm ban kơt nău rsong hăn bah nuĭh ƀon lan đŏng”.

Nău uĕh ma trong cao tốc nsĭt tay dŭt kloh rvah, lơn lah đah ăp doanh nghiệp tăch n’gluh ta Tây Nguyên. Wa Thái Như Hiệp, nuĭh tơm hãng cà phê Vĩnh Hiệp ta n’gor Gia Lai, ăp năm tăch n’gluh nklăp 150 rbăn tấn cà phê rnglăy, tĭng nău kơp nđăp: Tât geh trong cao tốc, ndơ tuch tăm mbra rdeng sŏng dăng tât ndrâm dak lêng, rgâl bah hôm ma rgum bun tât ăp nhih máy, kho tâl đâng ta Đồng Nai, Bình Dương. Nău dja mbra mpêt nkrem dŭt âk mông nar n’hanh roh huach prăk nchuăn rdeng, xơr, dăp, ndrel ăp  roh huach ntop geh tay (nklăp 20-25USD/tấn).

“Lah geh trong cao tốc Gia Lai hăn Qui Nhơn, Gia Lai hăn nkual ƀon têh Hồ Chí Minh, Gia Lai hăn Đà Nẵng ri nkra dŭt âk nkô̆ nău. N’hao rnoh khlay ndơ tuch tăm n’hanh ăp doanh nghiệp mbra bah ir roh huach ntuh kơl tâm công nghệ, ndơ ntrŭp dŏng, ntuh kơl tâm nhih máy, ntŭk ntô ndơ dŏng”.

Tŏng an nău ŭch geh hun hao, 11 n’gor tâm nkual  miền Trung - Tây Nguyên dôl dăn đă Trung ương mĭn uănh ơm ntuh kơl tâm ăp trong cao tốc rgum tơm khlay kơt Cao tốc Bắc- Nam mpeh nhâp nar, ăp trong cao tốc tâm nkual n’hanh mbluh nkual hŏ geh săk tâm dăp rgum. Wa Võ Ngọc Tuyên, Giám đốc Sở Kế hoạch n’hanh Đầu tư n’gor Dak Lak lah:

“11 n’gor duyên hải Miền Trung n’hanh Tây Nguyên mpôl hên geh nău mĭn nsum, dăn đă Chính phủ tâm lvang năm 2025 - 2030 ri  an ntuh kơl ƀư lor ăp njăr trong cao tốc hŏ geh tâm dăp rgum trong cao tốc Việt Nam. Mpôl hên dăn đă an rgâl lor bah kơi năm 2030 lăp tâm lvang năm 2025 - 2030 ntuh kơl lôch jêh ăp njăr trong dja. Lah lăp kan ri nklăp nău rêh bah nuĭh ƀon lan nkual Tây Nguyên mbra hun hao ngăch, di trong rƀŏng”.