Jêh 11 năm bah nar dơi Tổng Bí thư tât chop khâl, ntrŭt đă, wa Thào Dìn-du hê ƀon lan nuĭh Mông ta thôn Cốc Phương, xă Bản lầu, nkuăl Mương Khương, n’gor Lào Cai aƀaơ nchrăp lăp năm ranh  hôm e nkah gĭt nâm ơm ăp nău ntĭnh ntăn ma lăp jru bah nuĭh kruanh têh ngăn bah Đảng.

Năm nĕ, wa lah ntoh măt nuĭh ƀon lan ƀư lŏ mir blău ngăn bah Mường Khương kơt Lào Cai dơi Tổng Bí thư Nguyễn Phú Trọng tât khâl jay. Ta năp nĕ, âk nuĭh lĕ gĭt tât Thào Dìn đah nău moh lah “Kđăch prit r”kŏ", geh ăp năm bah tăch prit rkŏ hao tât 700 rkeh prăk. Yơn rnôk Tổng Bí thư tât, mô knŭng an âk nău rnê, wa hôm lah ăp nău lĕ rngôch ăp nuĭh bah cán bộ, kruanh tât nuĭh ƀon lan ndrel mĭn. Nĕ lah hun hao wăng sa an uănh tâm kơl ndrel hao, mô an geh nău tâm ƀah ndrŏng ach o; nuĭh lĕ ndrŏng an kơl nuĭh hôm e ach o, đảng viên ndrŏng kơl an đảng viên hôm e jêr jŏt lơn gay “lĕ rngôch ndrel ndrŏng hao, lĕ rngôch ndrel rklaih luh ach o”.

Tăng wa lah ndrĭ gâp an nti êng, mĭn trong m’hâm ƀư gay rnăk wâl hun hao, jêh nĕ an tâm rnglăp, geh moh ndơ jêr lĕ ƀon tâm kơl ri mư dơi rgâl.

Đah wa Thào Dìn, ăp nău ntĭnh bah Tổng Bí thư lah nuih n’hâm gay tât nar aơ, bôl mô geh kƀah ndơ sa, ndơ ntêm, wa hôm e săch rêh tâm jay cấp 4 uĕh reh, ăp nar đah mir. Nuĭh ƀon lan thôn Cốc Phương gơih nđơr tâm rlong, aƀaơ mô hôm geh rnăk ach o, geh tât rlău 70% lah rnăk sâm geh, dơi kơp dơn lah thôn ƀon mhe leo lor.

Lah nuĭh dơi Tổng Bí thư chop khâl, nkoch bri, Trung tá Nguyễn Ngọc Hà, Đồn trưởng Pôih tahen n’har bri Bản Lầu, nkuăl Mường Khương hôm e nkah gĭt ăp nău ntrŭt nsôr bah Tổng Bí thư, ndrel nău ntĭnh cán bộ, tahen an ƀư uĕh  trong kan mât uănh n’har bri, tâm rnglăp nchră nău bah dih, lơn lah an ndâk njêng ƀon lan knơm nâp nâl.

Tĭng nuih n’hâm Tổng Bí thư Nguyễn Phú Trọng ntĭnh mpôl hên lĕ kơl kônh wa ƀon lan đah ăp nău ƀư ngăn ngên kơt pă tơm tăm, kon ntil, ntĭm kônh wa rgâl ntrong kan gay đăp mpăn nău rêh, ndâk njêng ăp ngih sam ƀŭt, bể re njrăng n’gang rmok dak an kon se gay nkah gĭt tay ăp nău rŏng bah kônh wa lĕ rgum mât, tĭng mpôl hên.

Djôt nău ntĭnh bah Tổng Bí thư, gưl ủy, n’gâng kan ƀon lan, rmôt vũ trang n’hanh nuĭh ƀon lan 12 rnoi nuĭh oh nô ta Bản Lầu ăp năm bah năp tâm rnglăp mro, nsrôih mât nâp ƀư tơm, đăp mpăn n’har bri. Bản Lầu aƀaơ mô knŭng rlu lah ntŭk tăm prit rkŏ, prit ngăn bah Lào Cai, ma hôm ntop tay âk rhiăng ha chè, quế, dŏng lĕ nkual ba kah Séng Cù, nsrôih ơm jêng xă thôn ƀon mhe n’hao prêh tâm rgŏ năp mô ngai./.