Rlău 35 năm rdâk njêng n’hanh hun hao, 10 năm tĭng ƀư rnoh tât kan gưl neh dak rdâk njêng ƀon lan mhe, nkuâl Lâm Hà – nkual wăng sa mhe bah nuĭh Hà Nội ta neh Lâm Đồng hŏ geh njuat hun hao lam lĕ rngôch ăp ntil trong kan.

Đah aƀaơ bơi n’gul rach năm bah năp nơh, hang rbăn druh ndăm hŏ ntĭnh Thủ đô gay lăp tâm Nam Tây Nguyên khai hoang pơk neh tĭng nău kuăl hăn rdâk njêng nkual wăng sa mhe. Ndơ ndrăp hăn bah khân păng mô dơn lah suan druh ndăm ma hôm lah nuih n’hâm bah ƀon tơm gay rdâk njêng du nkuâl hun hao. Khân păng ndjôt lĕ ma ăp săk ntơ way bên kơt Mê Linh, Gia Lâm, Từ Liêm, Đông Anh…. Gay moh săk an ăp ƀon, xã ta neh mhe. Xã Liên Hà, nkuâl Lâm Hà aƀaơ lah săk ntơ bah du xã ta nkuâl Đan Phượng, nkual ƀon têh Hà Nội. Wa Nguyễn Thị Bích Hạnh tĭng me bơ̆ lăp tâm Lâm Đồng bah jê̆, aƀaơ lah Kruanh Hội Liên hiệp bu ur xã Liên Hà an gĭt, lam xã geh rlău 2.000 rnăk đah nklăp 9.000 nuĭh. Kônh wa way mpơl nuih n’hâm tâm rnglăp tâm pah kan jan sa.

“Đah Liên Hà ri nuih n’hâm tâm rnglăp bah oh yuh bu ur tâm nău tĭng ƀư rdâk njêng ƀon lan mhe hŏ dơi n’hao. Oh yuh hŏ njêng ăp rmôt tâm boh tăm tơm dâu mât ndrŭng brai ta nkual rnoi mpôl đê̆. Oh yuh nuĭh Cil, K’Ho hŏ nsrôih tăm dâu, dơi ntop kơl manh tơm prăk bah Ntŭk rgum kan tuch tăm gay rvăt dông, ntuh kơl mât chăm ndrŭng brai n’hanh rvăt ntil tơm dâu mhe. Ntơm bah nê, nău rêh bah oh yuh dơi n’hao kloh, yor hŏ geh wăng sa ăp nar gay dŏng tâm nău rêh”.

Tât aƀaơ, rĭng geh tĭng bôk nuĭh ta nkuâl Lâm Hà, n’gor Lâm Đồng hŏ tât rlău 52 rkeh prăk, hao 2,5 tơ̆ rđĭl đah 10 năm bah năp nơh; rnoh rnăk ach o hŭch âk đŏng dơn hôm 1,68%; 100% xã dơi kơp dơn di rnoh rdâk njêng ƀon lan mhe; lah nkuâl tâl 5 bah n’gor Lâm Đồng dơi Thủ tướng Chính phủ kơp dơn lah nkuâl di rnoh rdâk njêng ƀon lan mhe lvang năm 2016 – 2020; n’hanh rhơn n’hao dơi Kruanh dak ntăm an Huân chương lao động hạng Ba.   

Wăng sa – rêh jêng kon nuĭh hun hao, nău rêh văn hóa nuih n’hâm bah ƀon lan ăp rnoi mpôl đê̆ ta Lâm Hà – nkual wăng sa mhe bah nuĭh Hà Nội ta Lâm Đồng dơi n’hao prêh đŏng. Wa K’Thế – Groi Giám đốc Trung tâm Văn hóa thông tin n’hanh thể thao nkuâl Lâm Hà an gĭt, tâm ăp nău kan văn hóa, lơn lah ăp nar kan têh khlay ta nkuâl, way mpơl dơi săk tơm bah nuĭh Hà Nội n’hanh nuĭh rnoi mpôl đê̆ ƀon tơm ta ntŭk.

“Săk ntơ “Lâm - Hà” lah ndop tay bah Lâm Đồng n’hanh Hà Nội, jêng nău tâm rnglăp bah ăp rnoi mpôl đê̆ tâm nkuâl dŭt uĕh, nơm geh tâm ăp trong kơl bah Đảng n’hanh Ngih dak. Mô dơn ƀon lan rnoi mpôl đê̆ ma Đảng, Ngih dak dŭt ŭch rŏng mât ndray ăp rup uĕh văn hóa way ơm đŏng kơt chĭng gong, mât ndray ăp nău mpât mprơ. Dŭt mpŏng Đảng, ngih dak mât uănh khlay, ntop kơl mât ndray văn hoá rnoi mpôl đê̆. Gay jêh aơ tay wăng sa mbra hun hao lơn, mbra dŏng ân lơn rgâl mhe kỹ thuật lơn tâm nău kan tuch tăm. Tâm nău mât ndray văn hóa ri mpôl hên mpŏng mbra n’glăp ntĭm nti tâm ăp nhih nti mpeh chĭng gong, mpât mprơ. Nkre rgop kơl ăp kon se gĭt mpeh văn hóa rnoi mpôl đê̆ nkre mât ndray rnoh khlay way ơm bah rnoi nuĭh he an rơh kơn bah kơi tay”.

Wa Trần Văn Hiệp, Kruanh UBND n’gor Lâm Đồng rnê âk ăp nău dơi geh khlay ma nkuâl Lâm Hà hŏ nsrôih dơi geh tâm bah ri aơ, nkre lah rjăp bôk nău kan rdâk njêng ƀon lan mhe hŏ jêng trong leo hun hao dăng, lam hvi tâm n’gor, dơi lam trong kan chính trị n’hanh ƀon lan nđơr kơt tĭng. Lam n’gor hŏ geh 107/111 xã di rnoh rdâk njêng ƀon lan mhe, 2 nkual ƀon têh lôch jêh nău dơn kan rdâk njêng ƀon lan mhe n’hanh 5 nkuâl dơi kơp dơn di rnoh rdâk njêng ƀon lan mhe. Wa Trần Văn Hiệp, lah:

“Gay ntĭk n’hao tay ăp nău dơi hŏ geh, mpôl hên dăn đă tâm let năp tay, nkuâl Lâm Hà ntrôl dăng dăp rgum tay nău kan tuch tăm, rgâl mhe trong ntĭt leo hun hao, rdâk njêng ăp nkual tuch tăm rgum tŏng săk kah uĕh n’hanh ƀoi tĭng tơm luh. Ntik lĕ săk geh, dơh uĕh bah n’gor, rgum ăp tơm ndơ an ntuh kơl hun hao wăng sa- rêh jêng kon nuĭh. Đăp mpăn pah kan n’hŭch ach o jŏ jong, đăp mpăn lam rêh jêng kon nuĭh. Ntik n’hao tay nău way ơm tâm rnglăp, rgop âk lơn đŏng, ngăn ngăn lơn đŏng tâm nău hun hao nsum bah n’gor Lâm Đồng”.