Tâm jay ka đar mhe ƀư tay, wa H’Náp Niê, nuĭh Êđê (ta ƀon Kplang, xă Tân Tiến, nkuăl Krông Pắk, n’gor Dak Lak) răm rhơn: lĕ rngôch rnăk wâl rlău 20 nuĭh geh 3 rơh, 4 rnăk jêt, lĕ trơn ntŭk gŭ mhe. Rnăk wâl wa geh bơi 2.000m2 neh gŭ n’hanh neh mir geh tâm dăp rgum ƀư trong cao tốc. Bôk năp, ăp nuĭh rvê yor rnoh trok, ntop kơl đêt nkop đah ntŭk tăch. Yơn jêh nĕ an saơ cán bộ bah nkuăl tât xă, thôn ƀon nkoch trêng rgŏ jă, wa H’Náp Niê dơi wât nău khlay bah trong cao tốc đah nău hun hao ƀon lan.

Kônh wa ta ƀon nơm ri mô wât âk mpeh trong cao tốc, yơn ma cán bộ tât rgŏ jă, nkoch trêng dŭt n’hâm, dŭt di, kônh wa he saơ tâm di, saơ di jêng răm rhơn trơn dơm. Geh nău kônh wa he geh nău mô ăp đêt, yơn ma yor nău nsum kônh wa nchrăp tâm pă. Rnăk wâl trơn luh ta aơ, ăp kon, ăp sau mbrơi mbrơi đăp mpăn ngih wâl hôm.

Ƀon Kplang lah ntŭk gŭ bah jŏ bâh kônh wa nuĭh Êđê. Wa H’Biơi Buôn Yă, Bí thư chi bộ ƀon Kplang (xă Tân Tiến, nkuăl Krông Pắk) an gĭt, naư nchrăp ƀư trong cao tốc Khánh Hoa-Buôn Ma Thuột hăn rlău n’gul ƀon, khuch tât n’gul rnoh nuĭh ƀon lan. Âk jay nâp nâl, âk mir tơm tăm khlay an chuk gay ƀư trong. Bôk năp, nău nkoch trêng, rgŏ jă gay kônh wa ŭch rnoh khlay trok neh dơi uănh lah jêr. Ndrĭ yơn, nău jêr mbrơi mbrơi dôh rklaih rnôk rmôt cán bộ nkuăl hăn ndrel đah cán bộ xă, thôn, ndrel gŭ, ndrel sa, ndrel nkoch trêng, rgŏ jă wât, tâm pă đah ƀon lan. Wa H’Biơi Buôn Yă an gĭt:

Nung nar ri kônh wa hăn kan, knŭng geh măng mư gŭ jay. Ăp đồng chí cán bộ, kruanh nkuăl hăn măng sĭt đah kônh wa, ngơi đah nău Êđê tay. Gâp djăt rgŏ jă, nkoch treng tâm di, uĕh tôr djăt, kônh wa di đŏng. Ndrĭ jêng kônh wa ăp nuĭh tâm ban ŭch, răm ăp nuĭh ƀư trong cao tốc.

Wa Trịnh Minh Tâm, Bí thư Đảng ủy nkre ƀư Kruanh UBND xă Tân Tiến, nkuăl Krông Pắk, n’gor Dak Lak an gĭt, lam xă geh 241 rnăk geh khuch yor ƀư nău nchrăp trong cao tốc Khánh Hòa-Buôn Ma Thuột. Aơ lah nău nchrăp ƀư têh ngăn, geh tât âk rnăk ngăn, yơn klŏ dơi geh nău tâm ban ŭch âk n’hanh sŏk trok neh ngăch ngăn.

Đah xă, lĕ trong chính trị lăp nkoch trêng ăp rnăk gay khân pơng gĭt nău ntrŭnh. Cán bộ tât rƀŭn ƀon lan, nkoch trêng rgŏ jă nuĭh ƀon lan gay ơm jao an neh. Tât rnôk aơ 241 rnăk lĕ jao an neh an ntŭk kan ƀư.

Ta “ntŭk tăm sầu riêng têh” bah Dak Lak, ntŭk “Neh khlay” kơt nkuăl Krông Pắk, nău sŏk neh ƀư ăp ndơ lah geh du nău. M’hâm ƀư gay dơi geh nău tâm ban ŭch bah nuĭh ƀon lan, wa Trần Hồng Tiến, Bí thư nkuăl ủy Krông Pắk, an gĭt, nĕ lah nău nsrôih, janh mĭn, janh ƀư n’hanh janh trok dơn lĕ nău kan bah rmôt cán bộ.

Jêr jŏt ngăn ta aơ lah nău tâm ban ŭch bah ƀon lan, m’hâm ƀư sŏk neh. Krông Pắk geh khuch têh ngăn đah rlău 300ha neh, dŭt âk neh lŏ mir khlay ngăn. Geh âk tơm sầu riêng năm tal 5-6 lah du năm geh 30-40 rkeh prăk. Yơn tĭng rnoh khlay ngih dak knŭng trok nklăp 7 rkeh dơm. Aƀaơ m’hâm ƀư gay nuĭh ƀon lan tâm ban ŭch, ndrĭ mpôl hên ndâk njêng mpôl ntĭm rđău gưl nkuăl, gưl xă, ndâk njêng ăp rmôt nkoch trêng, rgŏ jă.

Dăch ƀon lan, wât ƀon lan n’hanh janh mĭn, janh ƀư, janh tôk dơn nău kan lah ăp nău saơ na nê̆ ta rmôt cán bộ, kruanh, đảng viên ta nkuăl Krông Pắk, n’gor Dak Lak tâm nău mbơh ƀư sŏk neh nău nchrăp ƀư trong cao tốc Khánh Hòa-Buôn Ma Thuột. Knơm nĕ, nău nchrăp ƀư lĕ geh nău tâm ban ŭch âk bah nuĭh ƀon lan. Nău  rgop Đảng tâm di nuih n’hâm ƀon lan, lĕ rngôch kônh wa ta ăp ƀon lan nkuăl Krông pắk răm rhơn an neh an ngih dak ƀư trong cao tốc./.