Chi bộ Thôn 10A geh Đảng bộ xã Ea Kly, nkuăl Krông Pắc, n’gor Dak Lak săch leo ƀư nau kan “Chi bộ 4 ueh”. Tĭng nê, chi bộ ân geh dơi nkô̆: Ƀư ueh nau kan chính trị, nâp rƀŭn rgum, tâm rnglăp ueh, ƀư nâp ueh, cán bộ ueh, đảng viên blau. Gay dơi ƀư nau aơ, wa Trần Ngọc Quang, Bí thư Chi bọ thôn 10A mbơh: Chi uỷ hŏ nsing tâm nau ngăn bah nkuăl ndrel nau dăng bah ăp đảng viên rƀŭn nchră, tâm ban jao nau kan ngăn ân ăp nŭih ƀư. Knŭng jêh 3 khay ƀư, nau kan bah chi bộ hŏ ueh, nau mĭn bah đảng viên geh n’hao, ƀư ueh nau săk tam bah nau rđau kan hun hao văng sa, rêh jêng bah nkuăl:

 ‘Chi bộ, gưl uỷ chi bộ rƀŭn mbơh nau ntrŭnh tăm kao bar đah trong njêng nau ueh tâm ƀon lan, ƀư ueh nau rnglăp ntrong camera đăp mpăn tâm nkual tơm. Njêng ân kônh wa geh nau rnơm tâm chi bộ kŏ kơt lah đăp mpăn pah kan gay n’hao nau geh, rgâl nau rêh bah kônh wa tâm nkuăl”.

Đảng bộ xã Ea Sin, nkuăl Krông Búk, n’gor Dak Lak geh 13 chi bộ, đah 150 đảnh viên. Jêh geh Đảng bộ nkuăl săch rlong ƀư nau kan “Chi bộ 4 ueh”, Đảng uỷ xã hŏ ndâk, ntrŭnh nau kan, ƀư nau rgŏ jă, ký ton nau tâm rlong ndâk “Chi bộ 4 ueh” tâm 4 chi bộ geh: Chi bộ Quân sự xã, Chi bộ buôn Ea Káp, chi bộ buôn Ea Kring ndrel Chi bộ Buôn Ea Sin. Gay kơl an ăp chi bộ ƀư ueh nau kan, wa Vũ Văn Tuấn, Bí thư Đảng uỷ xã Ea Sin, nkuăl Krông Búk n’gor Dak Lak mbơh: Ndrel nau nau pă kan ân ăp đồng chí tâm gưl uỷ ƀư ân, uănh, ntĭm ăp chi bộ ntrŭnh ƀư nau kan, Đảng uỷ xã dŏng phần mền sổ tay đảng viên tât ăp chi bộ gay rgop nau n’hao nau rƀŭn:

 ‘Đảng bộ xã Ea Sin hŏ ntrŭnh ƀư phần mềm sổ tay đảng viên gay ƀư ngăn nau kan ntrơn rgâl mrô tâm nau ndâk njêng đảng. Bah nau ntrŭnh ƀư hŏ leo nsĭt ăp nau dơi ueh ngăn. Ntoh kơt lah ăp nau mbơh, nau rƀŭn bah đảng uỷ, bah gưl kan ba lơ kŏ geh ntrŭnh ƀư năn tât ăp chi bộ, tă bah nê ăp chi bộ ntrŭnh tât ăp đảng viên gay ma uănh, gĭt năn mô rlu n’hao prêh nau rƀŭn rgum tâm chi bộ rƀŭn tâm dâng tâm nau kan ndâk njêng chi bộ 4 ueh”.

Ntơm bah nau ƀư rlong nau kan “Chi bộ 4 ueh” 5/5 chi bộ geh săch rlong ƀư tâm Đảng bộ nkuăl Krông Pắk, n’gor Dak Lak geh ƀư ngăn nau tâm rlong ân tâm di ma nau geh bah nkual, rmôt kan. Wa Trần Quốc Vĩnh, Groi Bí thư nkuăl uỷ Krông Pắk, n’gor Dak Lak ân lah, ntơm nau kan aơ hŏ njêng nau khuch tâm lam Đảng bộ nkuăl, tă bah nau kan aơ njêng nau rƀŭn khuh tâm lam Đảng bộ nkuăl, rgop nau n’hao nau rđau, n’hâm tâm lơh bah ntŭk kan đảng ndrel nŭih cán bộ, đảng viên:

 “Âk chi bộ geh dŏng nau nchră, ndâk nau ntrŭnh tâm dăch ma nau ngăn bah ntŭk kan nơm. Tal bar đŏng lah geh nsum ma nau kan bah ăp đảng viên, ngăn lah nŭih dâk bôk. Ndri ma pă nau kan, jao nau kan ân ăp cán bộ đảng viên ân kloh, tâm dăch ma nau ngăn. Tă bah nê nau nâp tâm nau rƀŭn rgum ma ngăn lah 4 nkô̆ nau phung hên rgŏ jă geh ƀư tĭng nau ueh, rjăp nâp lơn”.

Gay nau kan tâm rlong ndâk “Chi bộ 4 ueh”, “Đảng bộ tâm dâng ueh” geh ƀư mro, njêng nau khuch răm tâm nau tâm rlong, tam, Rnâng kan rđau kan Đảng bộ n’gor Dak Lak hŏ ƀư nau rgŏ jă nau tâm rlong lam đảng bộ. 20 đảng bộ tâm dâng bah N’gor uỷ Dak Lak hŏ kí ton nau tâm rlong ndâk “Chi bộ 4 ueh” “Đảng bộ tâm dâng ueh” lvang năm 2023-2028. Ntơm bah aơ, Rnâng kan ăp nkuăl uỷ, Thị uỷ, Thành uỷ ndrel ăp đảng uỷ tâm n’gor uỷ ndâk nau nchrăp, ƀư nau tâm rlong “Chi bộ 4 ueh” “đảng bộ tâm dâng 4 ueh”. Ăp năm rhuăt luh nau tă blau ndrel lŏ pơk hvi lơn tay gay rƀŏng tât jêng nau dơi nsum bah chi bộ, đảng bộ tâm dâng. Wa Y Biêr Niê, Groi Bí thư N’gor uỷ Dak Lak mbơh:

‘Ndâk chi bộ 4 ueh, đảng bộ 4 ueh aơ knŭng lah nhoat bôk năp yơn păng kŏ lah ntŭk gay ma ân ăp chi bộ, ăp đảng bộ tâm dâng uănh rjăp ăp nau kan gay dơi geh ƀư tâm năm 2024 ndrel ăp năm ba kơi”.

 Ntơm bah nau săk tam nau rlong “Chi bộ 4 ueh”, âk nkuăl tâm n’gor Dak Lak dôl ăp nhoat ƀư rêng tât ăp chi bộ, đảng bộ. Aơ geh uănh lah nau kan khlay gay njêng nau rgâl mhe, rjăp tâm nau n’hao nau rđau kan, n’hâm tâm lơh bah ntŭk kan bah Đảng ndrel nau nâp blau bah cán bộ, đảng viên bah n’gor tĭng dơi nau ŭch nau kan tâm rnôk mhe./.