Kêng măng 10/7, nthoi tay rơh hop tâl 35, Ủy ban Thường vụ Quốc hội hŏ an nău rgop mpeh trong nchrăp ƀư rgum nchră bah Quốc hội mpeh nău kan groi nđôi gưl têh n’hanh pah kan nchră rgum nchră. An nău rgop ta rơh hop, Kruanh Quốc hội Trần Thanh Mẫn nkoch kloh Quốc hội khóa XV hŏ ƀư ăp rgum nchră, geh nău ring lam tâm nău rêh, dơi cử tri n’hanh ƀon lan uănh khlay.

 Rgum nchră lah nău kan tâm di gay n’hao têh pah kan  groi nđôi bah Quốc hội, di đah nău dơn kan bah Quốc hội lah njêng pháp luật, groi nđôi gưl têh n’hanh n’glêh an ăp nkô̆ nău khlay bah neh dak. Kruanh Quốc hội lah rjăp pah kan nchrăp ân ăp dăp, tâm di đah nău ngăn geh bah ăp nhih pah kan bah Quốc hội; n’gluh trong kan têh, dĭ hvi, nkrum lam lĕ rngôch, tâm nê nkô̆ bah rgum bah tâm nchră ân dơi mĭn na nê̆, tâm rkhăch na nê̆, rgum ăp nkô̆ nău glo tơm ân nkra. Rgum nchră ân n’gluh nău dăn đă na nê̆, geh rnoh khlay  tâm pah kan groi nđôi; đăp mpăn di ngăn ngăn, geh nău dơi bah ăp trong nkra lah gay hun hao wăng sa- rêh jêng kon nuĭh bah neh dak.