Kêng măng (12/11), ta Hà Nội, râng Rƀŭn nchră n’gul gâl 1 năm mbơh ƀư rmôt râng mât rnă njrăng, đăp mpăn ta bah dâng, Thủ tướng Phạm Minh Chính đă: rmôt râng mât rnă njrăng, đăp mpăn ta bah dâng an tĭng ƀon lan, ngăch nking n’gang ăp nău jêr jŏt “bah ơm, bah ngai”; ndâk njêng xă, phường mô geh tih, mô ma túy... gay ăp thôn ăp nkual ƀon têh, ăp ƀon ngăn ngên lah “hăn lor mpeh rnă njrăng đăp mpăn”. Aƀaơ lam dak geh rlău 86.000 Rmôt mât rnă njrăng, đăp mpăn đah rlău 276.000 nuĭh râng.

Jêh 1 năm mbơh ƀư Luật rmôt tahen râng mât rnă njrăng, đăp mpăn ta bah dâng, săk rnglăy ntoh lư lah nu nău rnă njrăng bah dâng dơi mât nâp, nău tih na nao dơi hŭch; âk ntŭk djôt dơn nu nău rmanh prah tâm tom ndeh hŭch na nê̆, rmoh rmanh kon nuĭh dơi ntrôl rŭch; ntrong leo lam ƀon lan mât rnă njrăng Neh dak nar lơ hăn lăp jru ngăn ngên, rgop ndâk njêng, nâp nâl rnă njrăng nuĭh ƀon lan hăn ndrel đah mât rnă njrăng bri dak lam ƀon lan nar lơ nâp... Jao ăp nău ntrŭnh rnê nkhôm an ăp ntoh lư gĭt blău mhe ta Rƀŭn nchră, Thủ tướng Phạm Minh Chính mbah rhơn n’hanh mĭn lah ăp nău rgop khlay bah rmôt râng mât njrăng , đăp mpăn bah dâng-rmôt na nê̆ tĭng đah nuĭh ƀon lan. Bôl ndrĭ, Thủ tướng ntĭm kloh, rnoh ntop kơl ƀa ƀơ ăp khay an rmôt aơ ta du đêt ntŭk hôm e đêt; ndeh rklư, ndoh ndơ, ndơ ntop kơl hôm e jêr jŏt... Wa đă mĭn njêng dăn đă an trong kơl tâm pă tơm prăk Trung ương gay ntop kơl ăp ntŭk jêr jŏt, nkual yôk, nkual jru ngai tâm nău trok prăk kơl an, năp ndeh rklư an rmôt râng mât rnă njrăng, đăp mpăn ta bah dâng. N’gâng kan Công an an ƀa ƀơ uănh kơl ntĭm nti, n’hao nău gĭt blău pháp luật, nău kan, kơp uănh tay, ntrôl ngăch nău năp ndoh ndơ ntop kơl an rmôt kan gay tâm di nău đă, nău kan.